सोमेश्‍वरनगर, ता. २५ : पुणे जिल्हा ॲथलेटिक्स असोसिएशनच्या वतीने आयोजित केलेल्या मैदानी स्पर्धेत आपापल्या गटात सिद्धी संजय शिंदे हिने द्वितीय तर सृष्टी हरिबा नरळे हिने तृतीय क्रमांक पटकाविला आहे.
पुणे येथील बालेवाडी क्रीडांगण येथे नुकत्याच जिल्हास्तरीय मैदानी स्पर्धा पार पडला. यामध्ये सोरटेवाडी (ता. बारामती) येथील माध्यमिक विद्यालय करंजेची विद्यार्थिनी सृष्टी नरळे हिने ६०० मीटर धावणे या प्रकारात १४ वर्षाखालील मुलींच्या गटामध्ये तृतीय क्रमांक मिळविला. तसेच उत्कर्ष आश्रमशाळेची विद्यार्थिनी सिद्धी शिंदे हिने १६ वर्षाखालील मुलींच्या गटात ८०० मीटर धावणे या प्रकारात द्वितीय क्रमांक मिळविला.
दोघींचीही विभागस्तरीय स्पर्धेसाठी निवड झाली आहे. दोन्ही धावपटूंना निवृत्त रेल्वे पोलिस उपनिरीक्षक अंकुश दोडमिसे यांनी मार्गदर्शन केले. सोरटेवाडीचे विद्यालयाचे मुख्याध्यापक संजय लकडे, उत्कर्ष आश्रमशाळेचे अध्यक्ष अजिंक्य तावरे यांनी अभिनंदन केले.