सोमेश्‍वरनगर, ता. १३ : येथील मु. सा. काकडे महाविद्यालयास सावित्रीबाई फुले पुणे विद्यापीठाच्या वतीने विज्ञान विभागातील ‘बीएस्सी एआय अँड मशिन लर्निंग’ व ‘बीएस्सी डेटा सायन्स’ या दोन अभ्यासक्रमांना परवानगी मिळाली आहे. यामुळे ग्रामीण भागातील विद्यार्थ्यांना प्रथमच हे विषय शिकण्याची संधी मिळणार आहे.
काकडे महाविद्यालयात वरिष्ठ विज्ञान विभागात बीएस्सीसाठी फिजिक्स, केमिस्ट्री, मायक्रोबायोलॉजी या विषयांतून पदवीची सोय उपलब्ध आहे. तसेच बीबीएसीए या संगणकाशी निगडित पदवीचीही सोय आहे. नुकताच महाविद्यालयाने विद्यापीठाकडे नव्या अभ्यासक्रमांसाठी प्रस्ताव दिले होते. ग्रामीण भागातील विद्यार्थ्यांना डोळ्यापुढे ठेवून विद्यापीठाने तातडीने यात मंजुरी दिली आहे. बीएस्सी एआय या अभ्यासक्रमासाठी ६०, तर बीएस्सी डाटा सायन्स या अभ्यासक्रमासाठी ८० जागांना विद्यापीठाची मंजुरी मिळाली आहे.
काकडे महाविद्यालयात बारामतीचा पश्‍चिम भाग, पुरंदरचा दक्षिण-पूर्व भाग तसेच फलटण व खंडाळा तालुक्यातून विद्यार्थी येतात. या विद्यार्थ्यांना इंजिनिअरिंगला न आता जाता एआय, डाटा सायन्स हे अभ्यासक्रम शिकता येणार असून, त्यासाठी प्रवेशप्रक्रिया सुरू केली आहे, अशी माहिती महाविद्यालयीन समितीचे अध्यक्ष सतीश काकडे व प्राचार्य डॉ. देविदास वायदंडे यांनी दिली. बीएस्सी एआयनंतर अथवा डेटा सायन्सनंतर त्याच विषयांत एमएस्सी करता येते. याशिवाय रोबोटिक्स, डेटा सायन्स, परदेशात एमएस अथवा एमबीए अशा अभ्यासक्रमांना प्रवेश मिळू शकतो, तसेच चांगल्या नोकरीची अथवा स्टार्टअपची संधीही उपलब्ध असते, असेही डॉ. वायदंडे यांनी सांगितले.

हे विद्यार्थी पात्र
बीएस्सी एआय अभ्यासक्रमासाठी बारावी विज्ञान शाखेचे गणित व भौतिकशास्त्र हे विषय असणारे तसेच एकूण ५० टक्के गुण असलेले विद्यार्थीच प्रवेश घेऊ शकतात, तसेच बीएस्सी डेटा सायन्सला मात्र बारावी कला, वाणिज्य, विज्ञान अथवा व्होकेशनल शाखेचा ५० टक्के गुण असलेला विद्यार्थी पात्र ठरतो, अशी माहिती महाविद्यालयाचे सदस्य अभिजित काकडे यांनी दिली.