सोमेश्वरनगर : आपल्या समाजामध्ये सैनिकांना अत्यंत आदराचे स्थान आहे. त्यांच्या शब्दालाही मान आहे. त्यामुळे सेवेतून निवृत्त झाल्यानंतर सैनिकांनी गावोगावचे तंटे सामोपचाराने मिटविण्यासाठी पुढाकार घ्यावा. लोकांना चांगल्या मध्यस्थांची गरज असते, असे मत सोमेश्वर कारखान्याचे अध्यक्ष पुरुषोत्तम जगताप यांनी व्यक्त केले. करंजेपूल (ता. बारामती) येथे बारामती तालुका आजी-माजी सैनिक संघाच्या मुख्य कार्यालयासमोर जगताप यांच्या उपस्थितीत स्वातंत्र्यदिन साजरा झाला. याप्रसंगी ते बोलत होते. सोमेश्वर कारखान्याचे उपाध्यक्ष मिलिंद कांबळे, संचालक शैलेश रासकर, ऋषिकेश गायकवाड, सरपंच पूजा गायकवाड, माजी सरपंच बाळासाहेब गायकवाड, सराफ संघटनेचे नेते किरण आळंदीकर, उद्योजक संतोष कोंढाळकर, पोलिस उपनिरीक्षक राहुल साबळे, उद्योजक दीपक साखरे, शिवाजी शेंडकर, सुखदेव शिंदे, मोहन गायकवाड, रामचंद्र शेलार, राजाराम शेंडकर उपस्थित होते. कार्यक्रमात दिवंगत सुभेदार कै. बाळासाहेब शेंडकर यांना श्रद्धांजली अर्पण करण्यात आली. परिसरातील वीरपत्नींचाही गौरव करण्यात आला. परिसरातील गुणवंत शालेय विद्यार्थ्यांचा सत्कार केला गेला. तसेच पोलिस उपनिरीक्षकपदी बढती झाल्याबद्दल दीपक वारुळे यांचाही सत्कार संपन्न झाला. सैनिक संघाचे अध्यक्ष ताराचंद शेंडकर यांनी प्रास्ताविक तर भाऊसाहेब लकडे यांनी स्वागत केले. ॲड. गणेश आळंदीकर यांनी सूत्रसंचालन केले. भगवान माळशिकारे यांनी आभार मानले.