सोमेश्‍वरनगर, ता. २७ : वाणेवाडी (ता. बारामती) येथील न्यू इंग्लिश स्कूल या विद्यालयामध्ये संविधान दिनानिमित्त पोस्टर मेकिंग, चित्रकला अशा विविध स्पर्धांचे आयोजन केले होते. यानिमित्ताने गावातून ‘संविधान चिरायू होवो’ असा जयघोष करत प्रभातफेरी काढण्यात आली.
विद्यालयात डॉ. बाबासाहेब आंबेडकर यांच्या प्रतिमेला आणि संविधानास अभिवादन करून प्रभातफेरीचा शुभारंभ करण्यात आला. ‘भारताचा अभिमान भारताचे संविधान’, ‘संविधान दिन चिरायू होवो’ अशा घोषणा देत घोषवाक्य लिहिलेले फलक हातात घेऊन ग्रामप्रदक्षिणा घालण्यात आली. यानंतर संविधानाच्या उद्देशिकेचे सामूहिक वाचन करण्यात आले.
मुख्याध्यापक मानसिंग जाधव, प्राजक्ता यादव यांनी संविधानाबद्दल माहिती दिली. सीमा पवार व अनिता पवार यांनी संविधानावर आधारित प्रश्नमंजूषा, कलाशिक्षक गणेश पोंदकुले यांनी पोस्टर मेकिंग व चित्रकला स्पर्धेचे आयोजन केले. याप्रसंगी पाहुण्या म्हणून राज्यकर निरीक्षक वृषाली गडदरे उपस्थित होत्या. अशोक भोसले यांनी सूत्रसंचालन केले. युवराज वणवे यांनी आभार मानले.