शेटफळगढे, ता. १५ : येथील प्राथमिक आरोग्य केंद्रात प्रसूतीदरम्यान झालेल्या बाल मृत्यूप्रकरणी अतिरिक्त जिल्हा आरोग्य अधिकारी यांच्या पथकाने चौकशी समितीमार्फत चौकशी करण्याचा निर्णय घेतला. तसेच, येथील कर्मचाऱ्यांची बदली करण्याचे आश्वासनही ग्रामस्थांना दिले.
शेटफळगढे (ता. इंदापूर) येथील आरोग्य केंद्रात गर्भवती महिला प्रसूतीसाठी दाखल झाली होती. दुर्दैवाने प्रसूतीनंतर बाळ मृत पावले. यावेळी येथे वैद्यकीय अधिकारी हजर नसल्यामुळे आणि आरोग्य सहायिकेने प्रसूती केल्यामुळे बाळ दगावल्याचा आरोप संबंधित पालकांनी केला होता. २५ एप्रिलला सदरची घटना घडूनही कोणत्याही प्रकारची कारवाई आरोग्य विभागाने केली नव्हती. त्यामुळे याबाबत सामाजिक कार्यकर्त्यांनी पालकांना न्याय देण्यासाठी जिल्हा आरोग्य अधिकारी डॉ. रामचंद्र हंकारे यांच्याकडे केली होती.
या तक्रारीची दखल घेत आरोग्य विभागाने अतिरिक्त जिल्हा आरोग्य अधिकारी डॉ. विजयकुमार वाघ यांच्या पथकाने सोमवारी शेटफळगढे येथे भेट दिली. या वेळी वाघ यांनी ग्रामस्थ आणि सामाजिक कार्यकर्ते यांच्याशी संवाद साधून माहिती घेतली. तसेच, येथील प्राथमिक केंद्रात तातडीने बायोमेट्रिक बसविण्याच्या सूचना केल्या. तसेच, प्रसूतीदरम्यान झालेल्या बालमृत्यूची चौकशी करण्यासाठी समिती नेमून त्याचा अहवाल सादर केला जाणार असल्याचे सांगितले. तर, दोषीविरोधात खात्याअंतर्गत कारवाई करण्याचे संकेत दिले. यावेळी तालुका आरोग्य अधिकारी डॉ. सुरेखा पोळ आणि आरोग्य विभागाचे कर्मचारी हजर होते.