शेटफळगढे, ता १८ : इंदापूर तालुक्यातील शेतकऱ्यांनी शेतीच्या पाण्याचा प्रश्न सोडवण्यासाठी दौंडचे आमदार राहुल कुल यांना साकडे घातले आहे. शेतीच्या पाण्याचा प्रश्न जलसंपदा मंत्री राधाकृष्ण विखे पाटील यांच्याशी बैठक लावून प्रश्न मार्गी लावण्यासाठी प्रयत्न करणार असल्याचे आश्वासन शिष्टमंडळाला कुल यांनी दिले.

खडकवासला कालव्यावर दौंड आणि इंदापूर तालुक्यातील हजारो एकर शेती अवलंबून आहे. पुण्याच्या वाढत्या लोकसंख्येमुळे खडकवासला धरणातून मिळणारे पाणी कमी होत आहे. परिणामी इंदापुरातील शेतीला सर्वाधिक फटका बसत आहे. यावर तोडगा काढण्यासाठी उद्धव ठाकरे सरकारने पाच टीएमसी पाणी उजनी जलाशयातून उपसा सिंचन योजनेद्वारे उचलून प्रश्न मार्गी लावण्याचा प्रयत्न केला होता. मात्र, या योजनेला सोलापूरकरांनी विरोध केल्यानंतर तत्कालीन जलसंपदामंत्री जयंत पाटील यांनी इंदापूर तालुक्यातील शेतीच्या पाण्याची उपसा सिंचन योजना रद्द केली आहे. ती योजना पुन्हा मंजूर करून खडकवासला कालव्यावरील ताण कमी करण्याची मागणी लोकप्रतिनिधी सह शेतकरी वर्ग ही करत आहे.

शासनाच्या निर्णयाकडे शेतकऱ्यांचे लक्ष
इंदापूर तालुक्यातील उपसा सिंचन योजना केल्यास पुणे शहराच्या पिण्याचा पाण्याचा प्रश्न व शेतीच्या पाण्याचा प्रश्न मार्गी लागणार आहे. सत्ताधारी पक्षातील प्रमुख नेतेमंडळी या योजनेसाठी आग्रही असल्याने तालुक्यासह पुणे शहराच्या पाण्याचा प्रश्न मार्गी लावण्यासाठी शासन काय निर्णय घेणार याकडे शेतकऱ्यांसह पुणे शहरातील जनतेचे लक्ष लागले आहे.

इंदापूर तालुक्यातील शेतीच्या पाण्याचा प्रश्न गंभीर होत असल्याने खडकवासला कालव्यावरील ताण कमी करण्याच्या दृष्टीने महत्त्वाच्या असलेल्या उजनी उपसा सिंचन योजनेच्या माध्यमातून येथे कालव्यात पाणी टाकून शेती ओलिताखाली आणणे महत्त्वाचे आहे. इंदापूर तालुक्यात बरोबरच दौंड तालुका आणि शहराच्या पुणे शहराच्या दृष्टीने ही योजना होणे महत्त्वाचे आहे. ही बाब आम्ही दौंड तालुक्याचे आमदार राहुल कुल यांच्या निदर्शनास आणून देण्याचे काम केले आहे. प्रत्यक्ष भेटून संबंधित योजने संदर्भात कागदपत्र दिली आहेत.
- रमेश खारतोडे, माजी जिल्हा अध्यक्ष भारतीय किसान मोर्चा

01462