शेटफळगढे, ता २९ : निरगुडे (ता इंदापूर) येथे अतिक्रमण करू नका हे सांगायला गेलेल्या ग्रामसेवकाला शिवीगाळ व मारहाणीचा घटना घडली आहे. याबाबत ग्रामसेवक सूर्यकांत रामचंद्र गायकवाड (वय ५३) यांनी भिगवण पोलिस ठाण्यात तक्रार दिली आहे. सदर घटनेबाबत भिगवण पोलिसांनी निरगुडे (ता इंदापूर) येथील यल्लाप्पा मल्लापा लोखंडे, यांच्यावर शासकीय कामात अडथळा आणण्याचा गुन्हा दाखल केला आहे.
पोलिस सूत्रांनी दिलेल्या माहितीनुसार, २८ मे रोजी दुपारी १.१५ निरगुडे येथील ग्रामपंचायतच्या शासकीय जागेत जटाप्पा मल्लापा लोखंडे (रा. निरगुडे ता. इंदापूर) हे येण्याजाण्याच्या रस्त्यावर अतिक्रमण करून वाढीव बांधकाम करीत होते. याबाबत त्यांना ग्रामसेवक गायकवाड यांनी जाब विचारला असता. त्यांचा भाऊ यल्लाप्पा मल्लापा लोखंडे याने गायकवाड यांच्या शर्टची कॉलर धरून हाताने मारहाण केली. तसेच विट उचलून ग्रामसेवक गायकवाड यांना मारली. त्यामध्ये फिर्यादीच्या डाव्या हाताच्या दंडावर मार लागला. त्यामुळे ग्रामसेवक यांना शासकीय काम करीत असताना शासकीय कामात अडथळा निर्माण करून हाताने व लोखंडी थाप्पीने मारहाण करून शिवीगाळ व जिवे मारण्याची धमकी दिल्याची तक्रार पोलिसात दाखल झाली आहे. याप्रकरणी सहाय्यक पोलिस निरीक्षक विनोद महांगडे यांच्या मार्गदर्शनाखाली पोलिस हवालदार सचिन भस्मे तपास करीत आहेत.