शिरूर, ता. ८ ः शिरूर शहर व परिसरातून दुचाकी चोरीच्या घटना नित्याच्या झाल्या असून, नुकतीच एक नवी कोरी बुलेट चोरीला गेल्याने दुचाकी मालक धास्तावले आहेत.
उमेश आनंदा इसवे (रा. सुशीला अपार्टमेंट, रेव्हेन्यू कॉलनी, शिरूर) यांनी फिर्याद दिली असून, पोलिसांनी अज्ञात चोरट्याविरुद्ध बुलेट चोरीचा गुन्हा दाखल केला.
इसवे यांनी घराजवळच्या पार्किंगमध्ये लॉक करून ठेवलेली सुमारे दीड लाख रुपये किमतीची बुलेट चोरीला गेली. शिरूर तालुक्याच्या विविध भागातून दररोज किमान एक दुचाकी चोरीला जात असून, अनेक दुचाकींचा कुठलाही ठावठिकाणा लागत नसल्याचे चित्र आहे. काहींच्या चोरीला गेलेल्या दुचाकी कुठेतरी अज्ञात ठिकाणी सापडतात. परंतु, चोरटे या दुचाकींतील महत्त्वाचे स्पेअर पार्ट काढून या दुचाकी सोडून देत असल्याचेही निदर्शनास आले आहे. दहा ते पंचवीस हजार रुपये किमतीच्या दुचाकी सापडल्यानंतरही त्या सोडविण्यासाठी दोन ते पाच हजार रुपये खर्च येत असल्याने दुचाकी चालक त्रस्त झाले आहेत.