शिरूर, ता. ८ : तळोजा येथील कारागृहात नेत असताना लघुशंकेचा बहाणा करून पोलिसांना गुंगारा देत पळून गेलेल्या चोरट्याला शिरूरच्या पोलिस पथकाने गुन्हे शोध पथकासह तळोजा कारागृहाचे पथक व स्थानिक पोलिसांच्या मदतीने शुक्रवारी (ता. ८) रात्री पुन्हा गजाआड केले.
शिरूर येथील जैन मंदिरातील दानपेटी फोडून चोरट्यांनी गेल्या २० एप्रिलला सुमारे दोन लाखाची रोकड व पद्मावती देवीच्या गळ्यातील मंगळसूत्र चोरून नेल्याने शहरात खळबळ उडाली होती. या प्रकरणातील तिघांच्या टोळीला इतर गुन्ह्यात पकडून तळोजा कारागृहात ठेवले होते. जैन मंदिर चोरीप्रकरणी अधिक चौकशीसाठी शिरूरला आणले होते. पुन्हा तळोजा कारागृहात नेले जात असताना कारागृहापासून एक किलोमीटर अलिकडे लघुशंकेचा व पोट दुखत असल्याचा बहाणा करून मुजाहीद गुलजार खान (रा. कारेगाव, ता. शिरूर) याने पोलिसांना वाहन थांबविण्यास भाग पाडले व आडोशाला जात पळ काढला. या प्रकारावरून पोलिसांवर टीकेची झोड उठली होती.
दरम्यान, शिरूरचे उपविभागीय पोलिस अधिकारी प्रशांत ढोले, पोलिस निरीक्षक जोतीराम गुंजवटे, पोलिस उपनिरीक्षक एकनाथ पाटील यांनी या प्रकरणी तपासाची चक्रे वेगाने फिरवित पोलिसांची चार पथके तयार केली. स्थानिक दुवे शोधून काढत मुजाहीद खान याच्या बेलापूर पंचशील परिसरातून पुन्हा मुसक्या आवळल्या. त्यामुळे पोलिसांचा जीव भांड्यात पडला आहे.