शिरूर, ता. ४ : रस्त्याच्या कडेला मोटार थांबवून विश्रांती करीत असलेल्या मोटारीतील महिलेला दोघांनी चाकूचा धाक दाखवून त्यांच्या गळ्यातील मंगळसूत्र व कानातील रिंगा, असे सुमारे ९१ हजार रुपये किमतीचे सोन्याचे दागिने लुटून नेले. पुणे- नगर रस्त्यावर बोऱ्हाडे मळ्याजवळील (ता. शिरूर) कल्याणी हॉटेलसमोर शुक्रवारी (ता. ४) पहाटे साडेचारच्या सुमारास हा प्रकार घडला.
सुलोचना दुधाराम राठोड (रा. उत्तर वडोना, ता. नेर, जि. यवतमाळ) यांनी दिलेल्या फिर्यादीवरून शिरूर पोलिसांनी दोन अज्ञात चोरट्यांविरुद्ध गुन्हा दाखल केला. पोलिसांनी दिलेल्या माहितीनुसार, सुलोचना राठोड या आपला चुलत भाऊ याच्या मोटारीतून (क्र. एमएच ३७ एडी ८९०७) मूळ गावी जात असताना त्याला झोप येऊ लागल्याने विश्रांतीसाठी म्हणून त्यांनी हॉटेल कल्याणी समोरील मोकळ्या जागेत मोटार उभी केली. ते मोटारीतच बसून विश्रांती घेत असताना पहाटे साडेचारच्या सुमारास दुचाकीवरून आलेल्या दोघांनी आवाज देऊन मोटारीचा दरवाजा उघडायला लावला. त्यापैकी एकाने चाकूचा धाक दाखवून सुलोचना यांच्या गळ्यातील मनी मंगळसूत्र व कानातील रिंगा, असे सोन्याचे दागिने जबरदस्तीने हिसकावून ते पळून गेले.
या प्रकाराने घाबरलेल्या राठोड यांनी भावासह शिरूर पोलिसांकडे धाव घेऊन फिर्याद दिली. त्यांच्या फिर्यादीवरून दोन अज्ञात चोरट्यांविरुद्ध गुन्हा दाखल करण्यात आला असून, पुढील तपास पोलिस उपनिरीक्षक हनुमंत नकाते करीत आहेत.