शिरूर, ता. १९ : विनापरवाना देशी-विदेशी दारू विक्रेत्यांची धरपकड करण्याबरोबरच; हातभट्टी दारूधंद्याविरोधात शिरूर पोलिसांनी कारवाईचा बडगा उगारला असून, गेल्या दोन दिवसांत चार ठिकाणी छापेमारी करून पोलिसांनी दोन हजार रूपये किंमतीच्या देशी - विदेशी दारूच्या बाटल्यांचा साठा आणि शेकडो लिटर हातभट्टी दारू जप्त करून दारूधंदेवाल्यांना सुरूंग लावला.
न्हावरे व परिसरात काल सायंकाळपासून रात्री उशिरापर्यंत शिरूरच्या पोलिस पथकाने तीन ठिकाणी छापे टाकून विनापरवाना बेकायदेशीर हातभट्टी दारूचे धंदे उद्‌ध्वस्त केले. पोलिसांची चाहूल लागल्याने दारूधंदेवाले पळून गेले. मात्र, एका महिलेसह दोघांविरुद्ध बेकायदा हातभट्टी दारूविक्रीप्रकरणी शिरूर पोलिस ठाण्यात गुन्हे दाखल केले आहेत. न्हावरे गावापासून जवळच घोडगंगा कारखाना रस्त्यावर दोन ठिकाणी आणि न्हावरे गावाजवळ एका ठिकाणी बेकायदा हातभट्टी दारूविक्री होत असल्याची माहिती मिळताच पोलिस पथक घटनास्थळी दाखल झाले, अशी माहिती शिरूर पोलिस ठाण्याचे पोलिस निरीक्षक संदेश केंजळे यांनी सांगितले.
न्हावरे येथे अर्जुन बंटी गव्हाणे (रा. न्हावरे, ता. शिरूर) हा हातभट्टी दारू विकत असल्याचे समजताच पोलिसांनी रात्री ११ वाजण्याच्या सुमारास तेथे छापा टाकला. दहा लिटर च्या कॅण्डमधून तो दारू विकताना दिसताच पोलिसांनी त्याला पकडण्याचा प्रयत्न केला. मात्र, अंधाराचा फायदा घेऊन तो पळून गेला. तेथून दारूचे कॅण्ड व इतर साहित्य पोलिसांनी जप्त केले. तत्पूर्वी घोडगंगा कारखाना रस्त्यावर दोन ठिकाणी छापे टाकले. अर्जुन दुर्योधन चौगुले हा एका घराशेजारील पडक्या शेडमध्ये, पत्र्याच्या आडोशाला हातभट्टी दारू विकताना दिसून आला. पोलिसांची चाहूल लागताच घरामागील झाडीत तो पळून गेला. तेथूनही पोलिसांनी मोठया प्रमाणात हातभट्टी दारूचे कॅण्ड जप्त केले. याच परिसरात एक महिला देखील दारू विकताना दिसल्यावर पोलिसांनी तिच्याविरुद्धही गुन्हा दाखल केला.
दरम्यान, काल रात्री उशिरा गोलेगाव पासून जवळच दाणेवाडी फाटा येथेही पोलिसांनी छापा टाकला. तेव्हा त्या परिसरात विशाल पांडुरंग पाचर्णे (रा. तर्डोबाची वाडी, ता. शिरूर) हा बेकायदेशीरपणे देशी - विदेशी मद्याच्या बाटल्या विकत असताना आढळून आला. पोलिसांना पाहून पळून जात असताना पोलिस पथकाने चोहोबाजूने घेरून त्याला ताब्यात घेतले. त्याच्याकडून सुमारे दोन हजार रुपये किमतीच्या दारूच्या बाटल्या जप्त करण्यात आल्या.