शिरूर, ता. २८ : रांजणगाव गणपती (ता. शिरूर) येथे भाद्रपद गणेशोत्सवातील गेल्या चार दिवसांची द्वारयात्रा आणि गेले पाच दिवसांच्या पालखी सोहळ्याच्या शाही उत्सवाची गुरुवारी (ता.२८) हजारो गणेशभक्तांच्या उपस्थितीत उत्साहात सांगता झाली. राज्यभरातून आलेल्या सुमारे पाच लाख भाविकांनी रविवारपासून (ता. २४) सुरू झालेल्या आणि सांगता झालेल्या मुक्तद्वार यात्रेदरम्यान, महागणपतीचे स्पर्श करून दर्शन घेतले.
मंदिर गाभाऱ्यातील महागणपतीच्या मूर्तीला स्पर्श करून दर्शन घेता येत असल्याने तसेच जलाभिषेकही करता येत असल्याने जिल्ह्याच्या विविध भागासह राज्यातील अनेक गणेश भक्तांनी कुटुंबीयांसह हजेरी लावली. रांजणगावच्या चार दिशांना असलेल्या करडे येथील दोनलाई, निमगाव म्हाळुंगी येथील शिरसाई, गणेगाव दुमाला येथील ओझराई व ढोकसांगवी येथील मुक्ताई देवीच्या मंदिरापर्यंत गेले चार दिवस महागणपतीची पालखीतून मिरवणूक काढण्यात आली होती. पालखीची मंदिर प्रदक्षिणा व नगर प्रदक्षिणा आज सकाळी झाली. अखेरच्या दिवशीचा मान देऊळवाड्यातील सेवेकरी व पुजाऱ्यांना असल्याने मंत्रोपचारात महागणपती पालखीने मंदिर प्रदक्षिणा पूर्ण केल्यानंतर गुलालाची मुक्त उधळण करण्यात आली. पालखीच्या सांगतेनंतर मुक्तद्वार दर्शनाचा समारोप झाला. पालखीतील उत्सवमूर्ती पुन्हा मुख्य मूर्तीशेजारी गाभाऱ्यात स्थानापन्न केल्यानंतर श्री क्षेत्र रांजणगाव गणपती देवस्थान ट्रस्टचे मुख्य विश्वस्त डॉ. ओमकार देव यांनी महागणपतीस पंचमीची षोडशोपचार पूजा बांधली. पूजेनंतर लगेचच महागणपतीला सुवर्णालंकार व शाही वस्त्रांचा साज चढविण्यात आला. मोरया गोसावी व गणपतीची आरती झाल्यानंतर भाविक भक्तांसाठी महाप्रसादाचे आयोजन केले होते.

दरम्यान, भाद्रपद उत्सवादरम्यान सेवा बजावलेल्या पोलिस, महसूल कर्मचारी, स्वच्छता कर्मचारी व सेवेकऱ्यांचे तसेच भाविक भक्तांचे त्यांनी आभार मानले. देवस्थान ट्रस्टचे उपाध्यक्ष संदीप दौंडकर, सचिव डॉ. तुषार पाचुंदकर, खजिनदार विजय देव यांच्यासह उद्योजक दत्तात्रेय पाचुंदकर, पुजारी प्रसाद कुलकर्णी व मंदार कुलकर्णी, व्यवस्थापक बाळासाहेब गोऱ्हे, सहव्यवस्थापक पांडुरंग चोरगे, हिशेबनीस संतोष रणपिसे आदी यावेळी उपस्थित होते. शनिवारी (ता. ३०) प्रक्षाळपूजा व दुपारनंतर मानकऱ्यांना बिदागी वाटप व महाप्रसादाने या सोहळ्याची सांगता होणार आहे.

महागणपती मंदिराच्या प्रांगणात रविवारी भाद्रपद गणेशोत्सवाला तुकाराम बुवा दैठणकर यांच्या सनई वादनाने सुरुवात झाली होती. गेले पाच दिवस स्थानिक ग्रामस्थांबरोबरच जिल्ह्याच्या विविध भागातील भजनी मंडळांनी हजेरी लावून भजन सेवा बजावली. दिवसभर भजन, भक्तिगीतांच्या गायनाने मंदिर परिसरात प्रसन्नता भरली होती. गेले शंभर वर्षे गणेश चतुर्थीच्या कीर्तनाचा मान चक्रांकित महाराज यांच्या घराण्याला दिला जातो. चतुर्थीनिमित्त बुधवारी (ता.२७) अवधूत महाराज चक्रांकित यांचे गणेश जन्मावर आधारित कीर्तन झाले.

गेल्या पाच दिवसांत रांजणगावमध्ये महागणपतीच्या दर्शनासाठी येणाऱ्या भाविकांच्या गर्दीने आजवरचे सर्व उच्चांक मोडीत काढले. गेल्या चार दिवसांच्या मुक्तद्वार यात्रेसह आज सकाळपर्यंत सुमारे पाच लाख भाविकांनी महागणपती चरणी हजेरी लावून दर्शन घेतले.
- स्वाती पाचुंदकर, अध्यक्षा, श्री क्षेत्र रांजणगाव गणपती देवस्थान ट्रस्ट

मंदिर परिसरात आठ टन फुलांची सजावट
वर्षातील या मुख्य आणि मोठ्या उत्सवानिमित्त गेले चार दिवस मंदिरावर व परिसरात दररोज वेगवेगळ्या फुलांची आरास केली जात होती. शिखरावर गुलाबाच्या फुलांची तर मंदिर परिसरात सुमारे पाच टन झेंडू व तीन टन शेवंतीच्या फुलांची सजावट केली होती.