शिरूर, ता. १९ : शिरूर परिसरातील वाढती गुन्हेगारी आणि ढासळलेल्या कायदा-सुव्यवस्थेकडे लक्ष वेधण्यासाठी सामाजिक कार्यकर्ते नीलेश वाळूंज यांचे तहसील कार्यालयासमोर सुरू असलेले ठिय्या आंदोलन सहाव्या दिवशीही कायम आहे. सोमवारी प्रांताधिकारी विठ्ठल जोशी यांनी आंदोलनस्थळी भेट देऊन वाळूंज यांच्या मागण्यांबाबत सविस्तर चर्चा केली.
जयहिंद सामाजिक प्रतिष्ठानचे अध्यक्ष नीलेश वाळूंज बुधवारपासून (ता. १५) या आंदोलनास बसले आहेत. शिरूर तालुका नशामुक्त करणे, अवैध धंद्यांवर नियंत्रण मिळवण्यासाठी स्वतंत्र भरारी पथक नेमणे आणि पोलिसांच्या रिक्त जागा भरणे अशा त्यांच्या प्रमुख मागण्या आहेत. या आंदोलनाला विविध सामाजिक संघटनांचा पाठिंबा वाढत असून, ज्येष्ठ समाजसेवक अण्णा हजारे यांचे स्वीय सहायक दत्ता आवारी यांनीही वाळूंज यांची भेट घेतली.
दरम्यान, उपविभागीय पोलिस अधिकारी प्रशांत ढोले, पोलिस निरीक्षक संदेश केंजळे व तहसीलदार बाळासाहेब म्हस्के यांनीही आंदोलकांशी संवाद साधला. मात्र, जिल्हाधिकारी आणि जिल्हा पोलिस अधीक्षकांनी स्वतः शिरूरमधील परिस्थिती जाणून घेण्यासाठी वेळ द्यावा, या मागणीवर वाळूंज ठाम आहेत. ठोस उपाययोजना होईपर्यंत सत्याग्रह सुरूच ठेवण्याचा निर्धार त्यांनी व्यक्त केला आहे.