सासवड, ता. ३१ : चैत्र शुद्ध प्रतिपदा अर्थात गुढीपाडव्याच्या निमित्ताने सासवड (ता. पुरंदर) येथील बोरावके आळीतील लक्ष्मी बाल विकास मंदिरात श्रीराम आगमनाचा मनोहारी देखावा सादर करण्यात आला. यावेळी चिमुकल्यांनी प्रभू श्रीराम, माता सीता, लक्ष्मण, हनुमान, भरत, राजा दशरथ आणि शबरी यांच्यासारखी वेषभूषा करून उपस्थितांची मने जिंकली.
रावणाचा वध करून प्रभू श्रीराम, माता सीता आणि लक्ष्मण यांच्या अयोध्या नगरीतील आगमनाचे औचित्य साधून या कार्यक्रमाचे आयोजन करण्यात आले होते. त्यात चिमुकल्यांनी श्रीराम वनवासानंतरच्या आगमनाचा देखावा जिवंत केला. या कार्यक्रमाला पालकांनीही उपस्थिती दर्शवली. गुढ्या उभारून आणि औक्षण करून त्यांनी कार्यक्रमात सहभाग नोंदवला.
श्रीराम आगमनाच्या स्वागत यात्रेत सहभागी झालेल्या चिमुकल्यांवर पालकांनी पुष्पवृष्टी करून त्यांचे जल्लोषात स्वागत केले. यानंतर चिमुकल्यांनी संगीत नृत्याचे सादरीकरण केले. ‘‘सध्या लहान मुले मोबाईलच्या आहारी गेल्याने त्यांचे वाचन कमी झाले आहे. त्यांना आपल्या संस्कृतीची ओळख व्हावी, सण-उत्सवांचे महत्त्व कळावे, यासाठी या कार्यक्रमाचे आयोजन करण्यात आले.’’ असे मुख्याध्यापिका कल्पना भोंगळे आणि सहशिक्षिका शीतल होले यांनी सांगितले. याप्रसंगी मोठ्या प्रमाणावर पालक उपस्थित होते.