सासवड, ता. १३ : संयुक्त महाराष्ट्राच्या लढ्यात आपल्या वाणीने आणि लेखणीने महाराष्ट्राला एक नवी दिशा देणारे थोर साहित्यिक आचार्य प्रल्हाद केशव अत्रे यांच्या आठवणींना उजाळा देणारे सासवड (ता. पुरंदर) येथील ऐतिहासिक बुचाचे झाड मंगळवारी (ता. १३) झालेल्या जोरदार पावसामुळे उन्मळून पडले.
पहिल्या महायुद्धात सासवड परिसरातील हुतात्मा जवानांच्या स्मरणार्थ सन १९२८ मध्ये सासवड न्यायालयाजवळ उभारलेल्या हुतात्मा स्मारकाजवळ हा वृक्ष होता. या बुचाच्या झाडाचा इतिहास संयुक्त महाराष्ट्र चळवळीशी जोडलेला होता. आचार्य अत्रे यांच्या सभांनी जेव्हा महाराष्ट्र अक्षरश: ढवळून काढला होता, त्या वेळी सासवडमध्ये आयोजित एका महत्त्वपूर्ण सभेसाठी याच हुतात्मा स्मारकाची जागा निवडली होती. त्या ऐतिहासिक क्षणी, आचार्य अत्रे यांच्या हस्ते या बुचाच्या रोपाचे वृक्षारोपण केले होते. या झाडाच्या पांढऱ्याशुभ्र फुलांनी हुतात्मा जवानांच्या स्मृतीस आदरांजली वाहावी, हा त्यामागचा उदात्त विचार होता.
विशेष म्हणजे, सासवड- नारायणपूर- कापूरहोळ या मार्गाच्या रुंदीकरणाचे काम सुरू असताना या स्मारकाचे आणि ऐतिहासिक महत्त्व जपणारे हे सात दशकांपासून उभे असलेले बुचाचे झाड वाचविण्यासाठी विशेष प्रयत्न केले होते. मात्र, निसर्गाच्या पुढे कोणाचेही चालत नाही. मंगळवारी सासवड परिसरात आलेल्या अचानक वादळी वाऱ्याने आणि जोरदार पावसाने या वृक्षाला जोरदार तडाखा दिला आणि ते उन्मळून पडले. या दुर्घटनेत स्मारकाजवळ उभी असलेली एक चारचाकी गाडीचेदेखील मोठ्या प्रमाणात नुकसान झाले.

आचार्य अत्रे यांनी लावलेले आणि हुतात्मा जवानांच्या स्मृतीशी जोडलेले हे वृक्ष उन्मळून पडल्याने सासवडच्या नागरिकांमध्ये एक प्रकारची शोककळा पसरली आहे. या ऐतिहासिक वृक्षाच्या आठवणी कायम सासवडकरांच्या मनात घर करून राहतील.
- अमित पवार, सामाजिक कार्यकर्ते, सासवड