सासवड, ता. १६ : सासवड- हडपसर रस्त्यावरील पवारवाडी (ता. पुरंदर) येथे रस्त्याच्या कडेला मोठ्या संख्येने भाजीपाला आणि फळविक्रेते बसतात. येथील रस्त्यावर वाहनांची सतत वर्दळ असते. या ठिकाणी वाहनचालक भाजीपाला खरेदी करण्यासाठी रस्त्यावरच थांबतात, त्यामुळे येथे वाहतूक कोंडी होत असून, अपघाताचा धोका वाढत आहे.
या ठिकाणापासून काही अंतरावरच उड्डाणपूल सुरू होतो. मात्र, येथे सेवा रस्ता नसल्यामुळे वाहने थेट मुख्य रस्त्यावरच थांबतात. त्यामुळे मागील बाजूने येणाऱ्या वाहनांना अचानक ब्रेक लावावा लागतो. प्रशासनाच्या दुर्लक्षामुळे ही परिस्थिती अधिक गंभीर झाली आहे. ही परिस्थिती सासवड- कोंढवा रस्त्यावरही आहे.
एखादा मोठा अपघात झाल्यावरच प्रशासन आणि हे विक्रेते जागे होणार का? असा प्रश्न येथील सामाजिक कार्यकर्ते संतोष जगताप यांनी उपस्थित केला आहे. प्रशासनाने लवकरात लवकर रस्त्याच्या कडेला अनधिकृतपणे बसलेल्या विक्रेत्यांबाबत भूमिका आवश्यक घेण्याची अपेक्षा नागरिक आणि वाहनचालकांकडून व्यक्त केली जात आहे.

05438