सासवड, ता. ९ : ‘‘आजच्या शिक्षकांनी माहिती देणारा आणि मार्गदर्शक या दोन्ही भूमिकांचा सुंदर समन्वय साधण्याची गरज आहे. त्यांनी तंत्रज्ञानाच्या गतीसोबत चालावं, पण त्याच वेळी संस्कारांचा धागा घट्ट धरून ठेवावा. ज्यामुळे उद्याची पिढी बुद्धिमान तसेच सुसंस्कृत बनेल,’’ असे मत पुरंदर शिक्षण प्रसारक मंडळाचे अध्यक्ष सतीश उरसळ यांनी व्यक्त केले.
पुरंदर तालुका मुख्याध्यापक संघ, माध्यमिक शिक्षक संघ, शिक्षक लोकशाही आघाडी आणि महिला शिक्षिका संघ यांच्या संयुक्त विद्यमाने गुरुकुल करिअर ॲकॅडमी सासवड (ता. पुरंदर) येथील सभागृहात पुरंदर तालुकास्तरीय आदर्श व गुणवंत शिक्षक पुरस्कार शनिवारी (ता. ४) कार्यक्रम पार पडला.
याप्रसंगी ​जिल्हा बँकेचे अध्यक्ष डॉ. दिगंबर दुर्गाडे, मुख्याध्यापक महामंडळाचे राज्याचे सचिव नंदकुमार सागर, जिल्हाध्यक्ष प्रसाद गायकवाड, प्राचार्य संदीप टिळेकर यांनी मनोगत व्यक्त केले. यावेळी तालुक्यातील चार मुख्याध्यापक, १० शिक्षक व चार शिक्षकेत्तर कर्मचाऱ्यांना गौरवचिन्ह, प्रमाणपत्र, संविधानाची प्रत देऊन सन्मानित करण्यात आले.
कार्यक्रमाचे संयोजन मुख्याध्यापक संघाचे सचिव मारुती झगडे, शिक्षक संघाचे अध्यक्ष दत्तात्रेय रोकडे, सचिन धनवट, टीडीएफचे अध्यक्ष जालिंदर घाटे, रमेश बोरावके, माध्यमिक शिक्षिका संघाच्या अध्यक्षा वर्षा देसाई, मोहिनी लोणकर यांनी केले. मुख्याध्यापक संघाचे तालुकाध्यक्ष दिलीप नेवसे प्रास्ताविक केले. तालुका मुख्याध्यापक संघ, माध्यमिक शिक्षक संघ, शिक्षक लोकशाही आघाडी आणि महिला शिक्षिका संघाचे सर्व सदस्य उपस्थित होते.

05818