सासवड, ता. ३१ : ​काळेवाडी (ता. पुरंदर) येथे पालखी महामार्गावर शुक्रवारी (ता. ३१) सायंकाळी भरधाव वेगाने येणाऱ्या अज्ञात वाहनाने रस्ता ओलांडत असलेल्या एका महिलेला जोरदार धडक दिली. या भीषण अपघातात महिलेचा जागीच मृत्यू झाला. आशा संजय काळे (वय ४२) असे अपघातात मृत्यू झालेल्या महिलेचे नाव आहे. मिळालेल्या माहितीनुसार, काळे या शुक्रवारी सायंकाळी काळेवाडी येथील पालखी महामार्गावरून रस्ता ओलांडत असताना, भरधाव वाहनाने त्यांना धडक दिली. मृत काळे या येथील माजी जिल्हा परिषद सदस्या संगीता काळे यांच्या जाऊबाई होत. त्यांच्यामागे पती, मुलगी आणि मुलगा असा परिवार आहे. ​दरम्यान, दिवे घाटापासून पुढे पालखी महामार्गाचे चौपदरीकरणाचे काम झाल्याने वाहनांचा वेग अधिक असतो. या रस्त्यावर तीन महिन्यांत हा दुसरा अपघात आहे.

05939