सासवड, ता. ७ : संत ज्ञानेश्वर महाराज पालखी महामार्गाचे काम अपूर्ण असतानाच तक्रारवाडी (ता. पुरंदर) टोल नाक्यावर वसुली सुरू झाल्याने शिवसेना उद्धव बाळासाहेब ठाकरे पक्षाने आक्रमक पवित्रा घेतला आहे. नियमबाह्य वसुली तातडीने थांबवून स्थानिकांना पूर्ण माफी द्यावी, या मागणीसाठी शिवसैनिकांनी टोल व्यवस्थापकांना निवेदन देत जोरदार निदर्शने केली.
पुरंदर तालुक्यातील सर्व खासगी, व्यावसायिक व शेतीपूरक वाहनांना टोलमधून पूर्ण सूट मिळावी. सेवा रस्ते, दिशादर्शक फलक आणि वृक्षारोपणासारखी कामे पूर्ण होण्यापूर्वीच वसुली सुरू करणे, हा कायदेशीर दरोडा आहे. ई-वाहने, महिला चालक, दिव्यांग आणि आजी-माजी सैनिकांना नियमानुसार सवलत द्यावी. वारी कालावधीत वारकऱ्यांच्या वाहनांना महिनाभर माफी द्यावी. टोल नाक्यावर पिण्याचे पाणी, शौचालय आणि टोईंग व्हॅनची माहिती देणारे फलक लावण्याची मागणी करण्यात आली.
​या आंदोलनात तालुकाप्रमुख अभिजीत जगताप, संतोष भोसले, राजाभाऊ क्षीरसागर, राजेंद्र जगताप आदी उपस्थित होते. मागण्या मान्य न झाल्यास तीव्र आंदोलनाचा इशारा यावेळी देण्यात आला.