तळेगाव दाभाडे, ता. ३ ः मावळ तालुक्यात गेल्या दहा वर्षांत अनेक निवडणुकांत भाजप पराभूत झाले. त्यानंतर नेतेमंडळींनी आत्मचिंतन करत नवी रणनीती आखण्यास सुरुवात केली. त्याची फळे आता सहकारी संस्थांच्या निवडणुकांत मिळू लागली आहे. अनेक निवडणुकांत भाजप समर्थक पॅनेल आणि उमेदवारांना यश मिळाल्याने तालुक्यातील राजकीय समीकरणांमध्ये लक्षणीय बदल होऊ लागले आहेत. दुसरीकडे राष्ट्रवादी काँग्रेसची पिछेहाट होत आहे.
जिल्हा परिषद, पंचायत समिती, लोणावळा व तळेगाव दाभाडे नगरपरिषद, तसेच वडगाव व देहू नगरपंचायतींमध्ये स्थानिक स्वराज्य संस्थांवर राष्ट्रवादी काँग्रेसने वर्चस्व प्रस्थापित केल्यानंतर भाजपने सहकार क्षेत्राकडे लक्ष केंद्रित केले. पवना कृषक सहकारी संस्था, कृषी उत्पन्न बाजार समिती, खरेदी-विक्री संघ आणि खादी ग्रामोद्योग संस्थांच्या निवडणुकांत भाजप समर्थक गटांना चांगले यश मिळाले. काही ठिकाणी राष्ट्रवादीचे पारंपरिक वर्चस्व कायम राहिले तरी अनेक संस्थांमध्ये भाजपने धूर्त रणनीतीवर समीकरणे बदलली.

भाजपची रणनीती
विशेषतः कृषी उत्पन्न बाजार समितीच्या निवडणुकीत राष्ट्रवादी काँग्रेसचे १३ सदस्य आणि भाजपचे केवळ पाच सदस्य असतानाही सभापतीपदी भाजपचे सुभाष जाधव विजयी झाले. या निवडीत भाजपने आखलेली रणनीती निर्णायक ठरल्याचे बोलले जात आहे. काही संस्थांमध्ये बिनविरोध निवडी घडवून आणण्यातही भाजप समर्थक गटांना यश आले.
मावळ तालुक्यातील सहकार क्षेत्रात राष्ट्रवादी काँग्रेसचे अनेक वर्षांचे वर्चस्व असतानाही बदलत्या राजकीय परिस्थितीत भाजपने मजबूत घुसखोरी केली आहे. आगामी काळात सहकार क्षेत्रातील हे बदल तालुक्याच्या राजकारणावर दूरगामी परिणाम करणारे ठरणार असल्याचे जाणकारांचे मत आहे.
-----