तळेगाव ढमढेरे, ता. ८ : महाराष्ट्रात सध्या दोन उपमुख्यमंत्री आहेत, स्थानिक स्वराज्य संस्थांमध्येही दोन उपसरपंच असावेत अशा प्रकारची तरतूद करावी, अशी मागणी जिल्हाधिकारी पुणे आणि पुणे जिल्हा परिषदेच्या मुख्य कार्यकारी अधिकाऱ्यांकडे शिरूर तालुक्यातील तळेगाव ढमढेरे ग्रामपंचायतच्या सरपंच अंकिता भुजबळ व उपसरपंच राहुल भुजबळ यांनी निवेदनाद्वारे केली आहे.
यासंदर्भात तळेगाव ढमढेरे ग्रामपंचायत सदस्य व बाजार समितीचे माजी उपसभापती अनिल भुजबळ म्हणाले की, महाराष्ट्रात सध्या दोन उपमुख्यमंत्री असून, तशाच प्रकारची दोन उपसरपंच पदाची तरतूद स्थानिक स्वराज्य संस्थांमध्ये (ग्रामपंचायत) करावी, अशा तरतुदीचा सकारात्मक अभिप्राय आम्हाला कळवावा असे म्हटले आहे. गावातही अनेक गट असतात, त्या गटापैकीच अनेक जण ग्रामपंचायत सदस्य झालेले असतात. ग्रामपंचायत सदस्य झाल्यानंतर प्रत्येकालाच पद मिळावे, अशी अपेक्षा असते. त्यातच सरपंचपद राखीव असले तर इतरांना संधी मिळत नाही. दोन उपसरपंच करण्याची तरतूद केली तर सर्वांनाच पाच वर्षाच्या कालावधीत उपसरपंच पदाची संधी मिळेल असेही अनिल भुजबळ यांनी सांगितले.