तळेगाव ढमढेरे, ता. २५ : तळेगाव ढमढेरे (ता. शिरूर) येथे शासकीय गोदामाजवळील न्हावरे रस्त्यावर अज्ञात वाहनाची जोरदार धडक बसून अनोळखी पादचाऱ्याचा चिरडून मृत्यू झाला.
याबाबत पोलिस हवालदार किशोर तेलंग यांनी माहिती दिली की, तळेगाव ढमढेरे येथे न्हावरे रस्त्यावर सोमवारी (ता. २४) रात्री पायी चालणाऱ्या अनोळखी व्यक्तीस अज्ञात चारचाकी वाहनाची जोरात धडक बसली. या अपघातात संबंधित पादचारी वाहनाच्या चाकाखाली चिरडून जखमी झाला. त्यात त्याचा मृत्यू झाला. या व्यक्तीचे वय साधारण ३५ वर्षांचे असून, त्याच्या अंगात काळ्या रंगाचा टी-शर्ट व काळ्या रंगाची फुल पॅन्ट आहे. उजव्या हातात काळ्या रंगाचा करदोडा आहे. यासंदर्भात पोलिस पाटील पांडुरंग नरके यांनी येथील पोलिस दूरक्षेत्रात फिर्याद दिली आहे. अज्ञात वाहनचालक वाहनासह पळून गेला असून त्याच्या विरुद्ध पोलिसांनी गुन्हा दाखल केला आहे.