तळेगाव ढमढेरे, ता.१५ : तळेगाव ढमढेरे (ता.शिरूर) येथील शिरूर कृषी उत्पन्न बाजार समितीच्या महात्मा फुले उपबाजारात सोमवारी (ता.१४) दीड हजार शेळी, बोकड व मेंढ्यांची विक्री झाली.
सध्या बहुतांश ठिकाणी यात्रा उत्सव सुरू असल्याने बोकड व मेंढ्यांना मोठी मागणी आहे. आजच्या बाजारात शेळी व बोकडाला कमीत कमी १२००० हजार ते २१००० हजार रुपयांपर्यंत आणि मेंढीला कमीत कमी ६५०० ते १५००० हजार रुपयांपर्यंत बाजारभाव मिळाला, असे प्रशासक अरुण साकोरे, सचिव अनिल ढोकले व सहसचिव अनिल ढमढेरे यांनी दिली. बाजारात पुणे, अहिल्यानगर, सातारा, अलिबाग, मुंबई आदी जिल्ह्यातून शेळी, बोकड व मेंढ्या खरेदी करण्यासाठी व्यापारी आले होते. तसेच पुणे व अहिल्यानगर जिल्ह्यातील मेंढपाळांनी व शेतकऱ्यांनी शेळी, बोकड व मेंढ्या विक्रीसाठी आणल्या होत्या.
दरम्यान, येथील उपबाजार शिरूर, हवेली, आंबेगाव, दौंड आदी तालुक्यातील पशुपालकांना फायदेशीर ठरत असल्याने मोठ्या प्रमाणात मेंढपाळ व शेतकरी शेळी, बोकड व मेंढी विक्रीसाठी आणत आहेत.