तळेगाव ढमढेरे, ता. १७ : तळेगाव ढमढेरे (ता. शिरूर) या ऐतिहासिक गावाची जिल्हा परिषद गट व पंचायत समिती प्रभाग रचनेत दोन जिल्हा परिषद गटात विभागणी झाल्याने संतप्त झालेल्या ग्रामस्थांनी शुक्रवारी (ता. १८) गाव बंद ठेवण्याचा निर्णय घेतला आहे. त्यानिमित्त सकाळी १० वाजता ग्रामसभा होणार आहे. त्यानंतर गावातील सर्व व्यवहार बंद राहणार असल्याच्या सूचनाही शिरूरचे तहसीलदार, गटविकास अधिकारी, गाव कामगार तलाठी, मंडलाधिकारी, विविध शाळा, सरकारी कार्यालये यांना दिल्या आहेत. तत्पूर्वी हनुमान मंदिरापासून मुख्य बाजारपेठेतून ग्रामपंचायत कार्यालयापर्यंत ग्रामस्थांतर्फे मोर्चा काढण्यात येणार आहे.
जिल्हा परिषद निवडणूक प्रारूप आराखड्यात तळेगाव ढमढेरे गावाची दोन गटांत विभागणी झाली आहे. यामध्ये सणसवाडी गटामध्ये प्रभाग क्रमांक एक समाविष्ट केला आहे, तसेच उर्वरित प्रभाग क्रमांक दोन ते सहा हे शिक्रापूर गटामध्ये समाविष्ट केले आहेत. ऐतिहासिक व मोठ्या लोकसंख्येचे गाव असूनही येथील ग्रामस्थ गुण्यागोविंदाने एकसंध राहिले आहेत. जिल्हा परिषद व पंचायत समितीच्या निवडणुकीत गावाचे दोन विभाग केल्याने सर्वच ग्रामस्थ संतप्त झालेले आहेत. यासंदर्भात शिवसेना उद्धव बाळासाहेब ठाकरे पक्षाचे आमदार सचिन आहेर यांनी बुधवारी विधान परिषदेत लक्षवेधी सूचना मांडून प्रशासनाचे लक्ष वेधले आहे. तसेच ‘सकाळ’नेही यासंदर्भात ग्रामस्थांच्या संतप्त भावना मांडल्या आहेत. सोशल मीडियावरही ग्रामस्थांतर्फे प्रारूप आराखड्याला विरोध दर्शविण्यात आला आहे.