तळेगाव ढमढेरे, ता.२८ : कासारी (ता. शिरूर) येथील सातपुते वस्तीवरील शेतकरी सुदर्शन महादेव काकडे यांच्या घरासमोरील गोठ्यातील गाईच्या वासराचा बिबट्याने रात्री फडशा पाडला. या घटनेमुळे शेतकरी व ग्रामस्थांत भीतीचे वातावरण निर्माण झाले आहे. कासारी परिसरात वारंवार बिबट्याचे दर्शन होत असून, यापूर्वीही पाळीव प्राण्यांवर बिबट्याने हल्ले करून नुकसान केले आहे. वनविभागातर्फे बिबट्या पकडण्यासाठी पिंजरा लावला. परंतु पिंजऱ्याकडे बिबट्या फिरकलाच नाही. तेथून पिंजरा काढून दुसरीकडे नेला. मात्र, बिबट्याचे सोमवारपासून पुन्हा विविध ठिकाणी शेतकऱ्यांना व ग्रामस्थांना दर्शन होत आहे. काकडे यांच्या गोठ्यातील गाईचे वासरू सुमारे १०० मीटर बिबट्याने फरपटत नेले. परिसरातील शेतकऱ्यांनी वासराचा शोध घेतला असता कालव्यामध्ये वासरू मृत्युमुखी पडल्याचे निदर्शनास आले. शरीरापासून गळ्याचा व तोंडाचा भाग पूर्णपणे बिबट्याने विलग केला होता. ग्रामस्थांनी वनविभागाला कळवताच वनविभागाचे अधिकारी प्रमोद पाटील यांनी तातडीने भेट देऊन मृत्युमुखी पडलेल्या वासराचा पंचनामा केला. दरम्यान, वनविभागाने पिंजरा लावावा, अशी आग्रही मागणी ग्रामस्थांनी केली आहे. कासारी परिसरातील बिबट्याचे भय मात्र जाता जाईना त्यामुळे शालेय विद्यार्थी, शेतमजूर, महिला, स्थानिक नागरिक, मेंढपाळ यांच्यामध्ये भीतीचे वातावरण निर्माण झाले आहे. दरम्यान, तळेगाव ढमढेरे, टाकळी भीमा, निमगाव म्हाळुंगी, करंजावणे आदी गावांमध्ये बिबट्याचे वास्तव्य वाढले आहे.