तळेगाव ढमढेरे, ता. २४ : तळेगाव ढमढेरे (ता. शिरूर) येथील शिरूर कृषी उत्पन्न बाजार समितीच्या महात्मा फुले उपबाजारातील मुख्य इमारतीच्या पाठीमागील भिंतीची अखेर डागडुजी करून दुरुस्ती करण्यात आली आहे.
याबाबत ‘सकाळ’मध्ये २ नोव्हेंबर रोजी ‘मनोहर असे तरी इमारत दिसे उदास’, या शीर्षकाखाली वृत्त प्रसिद्ध झाले होते. याची त्वरित दखल घेत बाजार समितीचे सचिव अनिल ढोकले व सहाय्यक सचिव अनिल ढमढेरे यांनी बाजार समितीच्या पाठीमागील भिंतीची १५ दिवसांत डागडुजी करून दुरुस्ती केली आहे. भिंतीला रंगकाम करून सुशोभीकरण केले आहे. तसेच, येथील आवारात नवीन स्वच्छतागृह बांधले आहे.
इमारतीच्या पाठीमागच्या भिंतीची प्रचंड दुरवस्था झाली होती. प्लास्टर उखडून विटा दिसत होत्या. त्यामुळे इमारतीला ओंगळ स्वरूप आले होते.
दरम्यान, वर्ष १९७७मध्ये शिरूर कृषी उत्पन्न बाजार समितीच्या तळेगाव ढमढेरे येथील महात्मा फुले उप बाजार समितीच्या मुख्य इमारतीची उभारणी केली आहे. त्यानंतरच्या काळात इमारतीचे सुशोभीकरण करून इमारतीसमोर महात्मा जोतिराव फुले यांचा पूर्णाकृती पुतळा उभा करून मेघडंबरी बसवण्यात आली आहे. शिरूर कृषी उत्पन्न बाजार समितीवर सध्या प्रशासक असून, ‘सकाळ’च्या बातमीनंतर त्वरित दखल घेऊन प्रशासनामार्फत दुरवस्था झालेल्या इमारतीच्या भिंतीची दुरुस्ती व सुशोभीकरण केल्याने शेतकरी, व्यापारी व ग्रामस्थांनी समाधान व्यक्त केले आहे.

08388