तळेगाव ढमढेरे, ता. १८ : शिरूर तालुक्यातील शिक्रापूर- न्हावरे हा राष्ट्रीय महामार्ग तळेगाव ढमढेरे गावातून जात असून, रस्त्यालगतच्या शेतकऱ्यांना भूसंपादनाची नोटीस न देता रस्त्याचे काम सुरू केले आहे. तळेगाव ढमढेरे व माळवाडी परिसरातील शेतकऱ्यांना भूसंपादनाचा मोबदला अद्याप मिळालेला नाही. संबंधित शेतकऱ्यांना भूसंपादनाचा योग्य तो मोबदला द्यावा, तसेच गावच्या हद्दीतून महामार्ग जात असल्याने रस्त्याच्या कडेच्या दुकानदारांचे नुकसान झाले आहे. त्यामुळे रस्त्याची रुंदी तीन मीटरने कमी करावी, अशी मागणी पुणे जिल्हा सहकारी दूध उत्पादक संघाचे अध्यक्ष ॲड. स्वप्निल ढमढेरे यांनी उपमुख्यमंत्री अजित पवार यांच्याकडे निवेदनाद्वारे प्रत्यक्ष भेटून केली.
बाधित शेतकऱ्यांना शेतजमिनीचा योग्य मोबदला मिळावा, तसेच गावातून तीन मीटरने रस्त्याची रुंदी कमी करावी, यासाठी आपण विशेष लक्ष घालून शेतकऱ्यांना न्याय द्यावा, अशी मागणी ॲड. ढमढेरे यांनी अजित पवार यांच्याकडे केली. त्यावर, परिस्थितीची पाहणी करून योग्य तो निर्णय घेण्यासाठी अधिकाऱ्यांना सूचना दिल्या जातील, असे आश्वासन अजित पवार यांनी दिले असल्याचे ॲड. ढमढेरे यांनी सांगितले.