तळेगाव ढमढेरे, ता.३०: तळेगाव ढमढेरे (ता. शिरूर) येथील कृषी उत्पन्न बाजार समितीच्या महात्मा फुले उपबाजारात सुमारे २००० च्या वर शेळी, बोकड व मेंढ्यांची विक्री झाली असल्याची माहिती प्रशासक हरिश्चंद्र कांबळे, सचिव अनिल ढोकले व सहाय्यक सचिव अनिल ढमढेरे यांनी दिली.
आठवडा बाजारात सोमवारी (ता.२९) झालेल्या ३१ डिसेंबरमुळे मोठ्या प्रमाणात शेळी, बोकड व मेंढ्यांना मागणी होती. परिणामी बाजारात पुरवठा ही तेवढ्याच प्रमाणात आल्यामुळे मोठ्या प्रमाणात खरेदी- विक्री झाली. सोमवारी झालेल्या बाजारात शेळी व बोकडाला सुमारे ८००० हजार ते २१००० हजार रुपयांपर्यंत बाजारभाव मिळाला. मेंढीला ४००० हजार ते ९००० हजार रुपयेपर्यंत बाजारभाव मिळाला. शेळी - मेंढी बाजारात विक्री मोठ्या प्रमाणात होऊन आर्थिक उलाढाल झाल्याने शेतकऱ्यांनी समाधान व्यक्त केले.
बाजारात अहिल्यानगर, पुणे, नाशिक, सातारा, बीड आदि जिल्ह्यातील शेतकऱ्यांनी शेळी - मेंढी विक्रीसाठी आणली होती. तसेच अहिल्यानगर, सातारा, अलिबाग, मुंबई, पनवेल, सोलापूर व पुणे जिल्ह्यातील विविध ठिकाणचे व्यापारी शेळी, बोकड व मेंढी खरेदीसाठी आले होते. ३१ डिसेंबरचा बाजार असल्याने मोठ्या प्रमाणात शेळी, बोकड व मेंढ्यांना मागणी होऊन तशा प्रमाणात पुरवठाही मोठ्या प्रमाणात करण्यात आला.
बाजार समितीतर्फे शेतकऱ्यांना प्रशस्त जागा उपलब्ध करून देण्यात आली असून पिण्याच्या पाण्याची सोय व स्वच्छतागृहाची सोय बाजार समितीतर्फे करण्यात आली आहे.

08518