तळेगाव ढमढेरे, ता. १६ : कासारी (ता. शिरूर) येथे रंगनाथ दगडे या मेंढपाळाच्या कळपावर हल्ला करून बिबट्याने एक मेंढा (बालिंगा) ठार केल्याची घटना शुक्रवारी पहाटे घडली आहे. मृत मेंढ्याचा वनरक्षक प्रमोद पाटील यांनी शुक्रवारी सकाळी पंचनामा केला आहे. गुरुवारी दगडे यांच्या मेंढरांच्या कळपावर हल्ला करून एक शेळी बिबट्याने ठार केली होती. लगेच दुसऱ्या दिवशी शुक्रवारी आणखी बिबट्याने हल्ला करून मेंढा ठार केला आहे.
दरम्यान, यापूर्वी दगडे यांच्या कळपावर हल्ला करून तीन शेळ्या व मेंढीचे कोकरू आणि एक मेंढा (बालिंगा) बिबट्याने ठार केले आहेत.
दगडे यांच्या मेंढरांच्या कळपावर हल्ला करून आत्तापर्यंत पाच शेळी- मेंढ्यांचा मृत्यू झाल्याने मोठे आर्थिक नुकसान झाले आहे. सध्या दगडे कुटुंब उघड्या रानावर मेंढरांचा कळप घेऊन वास्तव्यास आहे. बिबट्याने वारंवार हल्ले केल्याने दगडे कुटुंब भयभीत झाले असून, कासारी परिसरातून दीड ते दोन किलोमीटर अंतरावर बिबट्याच्या भीतीने वास्तव्याची जागा बदलणार असल्याचे दगडे यांनी सांगितले. गेल्या २० वर्षांपासून रंगनाथ दगडे यांचे कुटुंब कासारी व निमगाव म्हाळुंगी परिसरात वास्तव्यास असून त्यांच्याबरोबर पत्नी, दोन लहान मुली व मुले आहेत. दगडे यांच्या मेंढरांच्या कळपावर बिबट्याने वारंवार हल्ला केल्याने कासारी परिसरात वनविभागाने त्वरित बिबट्याला पकडण्यासाठी पिंजरा लावावा अशी मागणी दगडे व ग्रामस्थांनी केली आहे.