तळेगाव ढमढेरे, ता. १० : कासारी (ता. शिरूर) परिसरात बिबट्याने गुरुवारी (ता. ९) पहाटे जाळी तोडून एका शेळीचा फडशा पाडला. या घटनेमुळे परिसरात दहशतीचे वातावरण असून, वनविभागाने तातडीने पिंजरा लावावा, अशी मागणी ग्रामस्थांनी केली आहे.
कोंढापुरी हद्दीतील कासारी शिव रस्त्याजवळ मेंढपाळ श्रीकांत महादेव चोरमले यांचा मेंढरांचा कळप मुक्कामी होता. रात्रीच्या सुरक्षिततेसाठी त्यांनी सभोवताली जाळी लावली होती. मात्र, गुरुवारी पहाटे बिबट्याने ही जाळी तोडून एका शेळीवर हल्ला केला व तिला उसाच्या शेतात ओढून नेऊन ठार केले. या हल्ल्यात मेंढपाळाचे मोठे आर्थिक नुकसान झाले आहे. वनविभागाचे अधिकारी प्रमोद पाटील यांनी शुक्रवारी सकाळी घटनास्थळी भेट देऊन पंचनामा केला. यापूर्वीही कासारी परिसरात बिबट्याने पाळीव जनावरांवर हल्ले केले आहेत. वारंवार होणाऱ्या या हल्ल्यांमुळे शेतकरी व ग्रामस्थ भयभीत झाले असून, वनविभागाने परिसरात योग्य ठिकाणी पिंजरा लावून बिबट्याचा बंदोबस्त करावा, अशी मागणी जोर धरत आहे.