टाकळी हाजी, ता. ७ : फाकटे (ता. शिरूर) येथे बिबट्याने हल्ला करीत दोन शेळ्या ठार केल्या आहेत.
फाकटे येथील योगेश सावकार शितोळे यांचे शेतात घर असून, घराशेजारील गोठ्यात शेळ्या बांधलेल्या होत्या. बिबट्याने सहा फूट लोखंडी तारेवरून रात्री उडी मारून गोठ्यात प्रवेश केला. त्यानंतर तेथील दोन शेळ्या ठार केल्या. या बिबट्याच्या हल्ल्यामुळे योगेश शितोळे या शेतकऱ्याचे २० हजार रुपयांचे नुकसान झाले असून, वनरक्षक लहू केसकर महेंद्र दाते यांनी पंचनामा केला आहे.
बेट भागात सध्या ऊसतोडीचे काम सुरू असून, अनेक बिबटे उसाच्या बाहेर पडू लागले आहेत. ठिकठिकाणी शेतकऱ्यांना बिबटे दिसत असल्यामुळे पालक व शेतकरी वर्गात भीतीचे वातावरण आहे. कांदा लागवडीची कामे सुरू झाली असून, उसाशेजारील शेतात लागवड करताना मोठी सावधगिरी बाळगावी लागत आहे. अनेक ठिकाणी ऊसशेतीच्या मधून रस्ते जात असून, या रस्त्यांनी जाताना शालेय विद्यार्थी व महिलांना मोठी काळजी घ्यावी लागत आहे. ‘‘शेतकऱ्यांनी पशुगणना करून घेऊन पशूंच्या कानाला टॅग लावून घ्यावा. नैसर्गिक आपत्ती व बिबट्याच्या हल्ल्याने नुकसान झाल्यास शेतकऱ्याला नुकसानभरपाई देणे शक्य होते,’’ असे आवाहन शिरूर पंचायत समितीचे गटविकास अधिकारी महेश डोके यांनी केले आहे.