टाकळी हाजी, ता. ११ : टाकळी हाजी (ता. शिरूर) येथील साबळेवाडी गावठाण जागेवर अतिक्रमण करत तारेचे कुंपण तोडल्याप्रकरणी शिरूर पोलिस ठाण्यात पिता- पुत्रांच्या विरोधात गुन्हा दाखल केला आहे.
टाकळी हाजीचे ग्रामपंचायत अधिकारी राजेंद्र खराडे यांनी याबाबत शिरूर पोलिस ठाण्याला फिर्याद दिली असून, त्यानुसार भागा हरी भाईक व विश्वनाथ भागा भाईक या पिता- पुत्रांच्या विरोधात विरोधात सरकारी मालमत्तेचे नुकसान केल्याप्रकरणी गुन्हा दाखल केला आहे.
साबळेवाडी येथे ग्रामपंचायतीची दोन हेक्टर ६१ आर गावठाण जागा असून, या जागेवर येथील स्थानिक लोकांनी अतिक्रमण केले होते. ते काढण्यासाठी येथील सामाजिक कार्यकर्ते संतोष मोहन साबळे यांनी आंदोलन केले होते. त्यानंतर ग्रामपंचायतीने पोलिस बंदोबस्तामध्ये मार्च २०२५ रोजी सरपंच अरुणा घोडे व सदस्य ग्रामस्थ यांच्या उपस्थितीत सरकारी मोजणी पूर्ण करीत या ठिकाणचे अतिक्रमण काढून गावठाण जागेला तारेचे कुंपण घातले होते. त्यानंतरही या लगतच्या असलेल्या शेतकऱ्याने पुन्हा अतिक्रमण करण्याचा प्रयत्न केला, मात्र त्यावेळेस त्याला समज देऊन पोलिसांनी सोडले. मात्र, याच भाईक पिता पुत्रांनी पुन्हा अतिक्रमण करीत संरक्षण जाळी, कुंपण तोडली असून, त्यामध्ये मका पेरली आहे. याबाबत ग्रामस्थांमध्ये तीव्र नाराजी व्यक्त केली जात आहे. त्यामुळे ग्रामपंचायतीने पुन्हा पोलिस ठाण्याला तक्रार दाखल केली असून, त्यांच्यावर सरकारी मालमत्तेचे नुकसान केल्याप्रकरणी गुन्हा दाखल केल्याची माहिती पोलिस उपनिरीक्षक दिलीप पवार यांनी दिली. या गुन्ह्याचा तपास पोलिस हवालदार शिवाजी बनकर हे करीत आहेत.