टाकळी हाजी, ता. १ : इन्स्टाग्रामवर पाठवलेली फ्रेंड रिक्वेस्ट न स्वीकारल्याच्या कारणावरून डोंगरगण चौफुला (ता शिरूर) येथे एका २१ वर्षीय तरुणावर चार जणांनी हल्ला केल्याची धक्कादायक घटना उघडकीस आली आहे. ही घटना मंगळवारी (ता. ३०) दुपारी अडीचच्या सुमारास टाकळी हाजी- शिरूर रस्त्यावर डोंगरगण चौफुला येथील हॉटेलमध्ये घडली. या बाबत रोहन मळीभाऊ खामकर (वय २१, व्यवसाय- वेल्डिंग, रा. शिनगरवाडी) याने शिरूर पोलिस ठाण्यात फिर्याद दिली आहे. रोहन हा हॉटेल स्वरा येथे फॅब्रिकेशनचे काम करीत असताना अमर मुंजाळ (रा. डोंगरगण), हर्षद खाडे, करण चव्हाण (दोघे रा. म्हसे बु.) व सचिन पवार (पत्ता अज्ञात) हे तेथे आले. यांनी रोहनला एकत्रितपणे लाकडी दांडके, हात व लाथाबुक्क्यांनी मारहाण केली. या हल्ल्यात फिर्यादीच्या हातावर, डोक्यावर व तोंडावर गंभीर दुखापती झाल्या. याबाबत शिरूर पोलिस ठाण्यात गुन्हा नोंद केला आहे. या प्रकरणाचा तपास सहाय्यक फौजदार प्रशांत गायकवाड करीत आहेत.