टाकळी हाजी, ता ३ : शिरूर तालुक्यातील जांबूत, पिंपरखेडसह परिसरातील ग्रामस्थांनी सोमवारी कडकडीत बंद पाळत प्रशासनाचा निषेध केला.
गेल्या वीस दिवसांत या परिसरातील तीन जणांना बिबट्याच्या हल्ल्यामुळे जीव गमवावा लागल्याने या भागातील प्रत्येक माणूस हळहळ व्यक्त करीत आहे. या घटनेमुळे शालेय विद्यार्थी धास्तावले असून, जांबूत- पिंपरखेड परिसरातील सर्व शाळा सोमवारी बंद ठेवण्यात आल्या होत्या. पिंपरखेडचे सरपंच राजेंद्र दाभाडे म्हणाले, ‘‘शासनाने बिबट्याचा कायमस्वरूपी बंदोबस्त करणे काळाची गरज आहे. या घटनेमुळे सर्वसामान्य माणसाबरोबरच शालेय मुलेही घाबरलेली आहेत. शासनाला माणसापेक्षा प्राण्याची जास्त काळजी आहे काय?’’ जांबूतचे सरपंच दत्ता जोरी म्हणाले, ‘‘शासनाने हा प्रश्न गांभीर्याने घेऊन तत्काळ तोडगा काढणे गरजेचे आहे. उशीर लावल्यास अशाच प्रकारे निष्पाप लोकांचे बळी बिबट्या घेत राहणार आहे.’’