थेऊर, ता. १ : कदमवाकवस्ती (ता. हवेली) ग्रामपंचायतीने सार्वजनिक ठिकाणी कचरा टाकणाऱ्यांवर गाव विद्रूपीकरणाचा गुन्हा दाखल करून ५ हजार रुपये दंड आकारण्याचा निर्णय घेतला आहे, अशी माहिती उपसरपंच नसीर पठाण यांनी दिली आहे. या निर्णयामुळे ग्रामपंचायतीने ॲक्शन मोडवर आलेली दिसत आहे.
ग्रामपंचायतीची मासिकसभा मंगळवारी (ता. २९) पार पडली. यावेळी माजी सरपंच चित्तरंजन गायकवाड, गौरी गायकवाड, ग्रामपंचायत सदस्य आकाश काळभोर, अविनाश बडदे, सलीमा पठाण, सुनंदा काळभोर, सिमिता लोंढे, मंदाकिनी नामुगडे, ग्रामविकास अधिकारी अमोल घोळवे व नागरिक उपस्थित होते.
यासभेत सार्वजनिक ठिकाणी कचरा टाकणाऱ्यांवर कारवाईचा निर्णय सर्वानुमते घेतला आहे. ग्रामपंचायतीने त्वरित या निर्णयाची अंमलबजावणी करून सार्वजनिक ठिकाणी या कारवाईचे फलक लावले आहेत.
मागील चार महिन्यांपासून ग्रामपंचायत व स्वच्छ पुणे सेवा सहकारी संस्था यांच्या संयुक्त विद्यमाने ओला- सुका कचरा संकलन व घनकचरा व्यवस्थापन करीत आहे. घरोघरी जाऊन कचरा संकलन, वर्गीकरण व व्यवस्थापन करण्यात येत आहे. प्रत्येक घरासाठी ६० रुपये व हॉटेल व्यावसायिकांना १५० रुपये मासिक शुल्क आकारले जात आहे. या स्वच्छता कामात काही नागरिकांनी हरताळ फासला आहे. त्यामुळे ग्रामपंचायत प्रशासनाने हा निर्णय घेतला आहे. तसेच कचरा टाकणाऱ्याचा फलक बनवून प्रसिद्ध करण्यात येईल, असेही पठाण यांनी सांगितले.
दरम्यान, कदमवाकवस्ती गावात स्वच्छता पथकाच्या माध्यमातून घर ते घर कचरा गोळा केला जात आहे. मात्र, काही नागरिक कचरा वेचकांना कचरा न देता तो सार्वजनिक ठिकाणी टाकत असल्याचे आढळून आले आहे. त्यामुळे ग्रामपंचायतीने गावाचे विद्रूपीकरण टाळण्यासाठी, तसेच गाव स्वच्छ व सुंदर दिसण्याच्या दृष्टिकोनातून उचललेले पाऊल महत्त्वाचे ठरणार आहे.

शाळेत टवाळखोरांकडून रोजच कचरा
ग्रामपंचायतीच्या भिंतीला लागूनच प्राथमिक शाळा आहे. या शाळेच्या अंगणात दररोज रात्रीच्या सुमारास काही टवाळखोर मुले येतात आणि धिंगाणा करून शाळेचे नुकसान करतात. शाळेच्या परिसरात सिगारेट, गुटखा, तंबाखू या बरोबर दारूच्या बाटल्या रिचवत तेथेच टाकतात. त्यामुळे ग्रामपंचायत या टवाळखोर मुलांवर कधी व काय कारवाई करणार? हेही पाहणे महत्त्वाचे ठरणार आहे.

ग्रामपंचायतीने स्वच्छतेच्या संदर्भात घेतलेला हा निर्णय योग्य आहे. आपले गाव स्वच्छ ठेवणे, ही प्रत्येकाची जबाबदारी आहे. तुम्हाला कामामुळे कचरा वेचकांकडे कचरा देणे शक्य नसेल, तर कचरा बाहेर डस्टबिनमध्ये ठेवा. कचरा वेचक तुमचा कचरा उचलून घेऊन जातील. अन्यथा सार्वजनिक ठिकाणी कचरा टाकणाऱ्यावर गाव विद्रूपीकरणाचा गुन्हा दाखल करून दंडात्मक कारवाई करण्यात येणार आहे. तसेच, कचरा टाकणाऱ्याचा व्हिडिओ सोशल मीडियावर प्रसिद्ध करण्यात येईल.
- चित्तरंजन गायकवाड, माजी सरपंच, कदमवाकवस्ती