थेऊर, ता. ४ : विद्यार्थ्यांच्या सदनिकेचा दरवाजा उघडा असल्याची संधी साधून चोरट्याने चार लॅपटॉप व मोबाईल चोरून नेल्याची घटना कदमवाकवस्ती (ता. हवेली) येथील एमआयटी महाविद्यालय परिसरात शनिवारी (ता. २) सकाळच्या सुमारास घडली. या तीन घटनांमध्ये २ लाख १४ हजारांचा मुद्देमाल लंपास झाला आहे.
याप्रकरणी प्रथमेश अनिल चव्हाण (वय २०, सध्या रा. डी/९०४ फोर अव्हेन्यू, कदमवाकवस्ती), अथर्व ओमप्रकाश कारभारी (वय २०, डी/११०४ फोर अव्हेन्यू, कदमवाकवस्ती; मूळ रा. वाकड) व स्वप्नील संजय कुलकर्णी (वय २०, सध्या रा. फ्लॅट नं. १, चिंतामणी पार्क सोसायटी, अथर्व रेसिडेन्सी, कदमवाकवस्ती) यांनी लोणी काळभोर पोलिस ठाण्यात फिर्याद दिली आहे. त्यानुसार अज्ञात चोरट्याच्या विरोधात गुन्हा दाखल केला आहे.
पोलिसांनी दिलेल्या माहितीनुसार, वरील तीन विद्यार्थी लोणी काळभोर (ता. हवेली) येथील एका शैक्षणिक संकुलात शिक्षण घेत आहेत. तर शैक्षणिक संकुलाच्या जवळच असलेल्या इमारतींमध्ये सदनिका भाडेतत्वावर घेऊन राहतात. तिन्ही घटनेत मुलांच्या फ्लॅटचा दरवाजा उघडा असल्याने चोरट्यांनी हात साफ केला.
चोरट्याने प्रथमेश चव्हाण याचा ५६ हजार ५०० रुपयांचा लॅपटॉप, अथर्व कारभारी यांचा ५० हजार रुपयांचा लॅपटॉप चोरून नेला. तर, स्वप्नील कुलकर्णी याच्या सदनिकेमधून ४५ हजार व १५ हजार ५०० रुपये किमतीचे दोन लॅपटॉप, ४० हजार रुपयांचा अॅपल मोबाईल व ७ हजार रुपये किमतीचा विवो कंपनीचा मोबाईल चोरून नेला आहे. या तीन गुन्ह्यांमध्ये २ लाख १४ हजारांचा मुद्देमाल चोरी झाला आहे. पुढील तपास लोणी काळभोर पोलिस करीत आहेत.