थेऊर, ता. ४ : कदमवाकवस्ती, कुंजीरवाडी (ता. हवेली) ग्रामपंचायत हद्दीतील तीन वेगवेगळ्या हातभट्टी अड्ड्यांवर लोणी काळभोर पोलिसांनी बुधवारी (ता. ३) एकाच दिवशी छापे टाकले. या छाप्यात पोलिसांनी सुमारे ७ हजार ५०० रुपयांचा मुद्देमाल जप्त करून महिलेसह तिघांवर गुन्हा दाखल केला. नूतन योगेश लोंढे (वय २८, रा. जुन्या कॅनॉलजवळ म्हातोबाची आळंदी रोड, कुंजीरवाडी, ता. हवेली, जि. पुणे), बजीरंग भरत घोलप (वय ३०, रा. जुन्या कॅनल जवळ, माळवाडी, कुंजीरवाडी, ता. हवेली, जि. पुणे, मुळगाव नांदेड नाका, जय नगर, लातूर) व वैशाली रवींद्र झेंडे (वय ३८, रा. पालखी मैदानाजवळ, इंदिरा नगर, पुणे) अशी गुन्हा दाखल केलेल्या आरोपींची नावे आहेत.

लोणी काळभोर पोलिस हे पोलिस ठाण्याच्या हद्दीत बुधवारी गस्त घालत होते. गस्त घालताना, पोलिसांना काही ठिकाणी लपूनछपून हातभट्टी दारूची विक्री होत आहे, अशी माहिती पोलिसांना एका खबऱ्यामार्फत मिळाली होती. माहितीच्या अनुषंगाने पोलिसांनी कदमवाकवस्ती येथील इंदिरानगर परिसरात हातभट्टी विक्रीच्या अड्ड्यावर छापा टाकला. तेव्हा वैशाली झेंडे या बेकायदा हातभट्टी दारूविक्री करताना आढळून आल्या. पोलिसांनी त्यांच्याकडून सुमारे ३४ लिटर तयार हातभट्टी दारू जप्त केली. त्यानंतर पोलिसांनी कुंजीरवाडीतील दोन वेगवेगळ्या हातभट्टी विक्रीच्या अड्ड्यावर छापा टाकला. नूतन लोंढे व बजरंग घोलप हे देखील बेकायदा हातभट्टी दारू विक्री करताना आढळून आले. त्यांच्याकडून ४० लिटर दारू जप्त केली. दरम्यान, या कारवाईत ७ हजार ५०० रुपयांची सुमारे ७४ लिटर दारू जप्त केली. तर तिन्ही आरोपींच्या विरोधात महाराष्ट्र प्रोव्हिबिशन अॅक्ट कलम ६५ (ई) प्रमाणे गुन्हा दाखल केला आहे.

ही कामगिरी लोणी काळभोर पोलिस ठाण्याचे वरिष्ठ पोलिस निरीक्षक राजेंद्र पन्हाळे, पोलिस निरीक्षक (गुन्हे) स्मिता पाटील, सहाय्यक पोलिस निरीक्षक कृष्णा बाबर, पोलिस उपनिरीक्षक पूजा माळी, पोलिस हवालदार राणी खामकर, वैशाली नागवडे, विलास शिंदे, रामहरी वणवे, गणेश सातपुते, पोलिस अंमलदार शैलेश कुदळे, बाजीराव वीर, प्रवीण दडस, प्रदीप गाडे व त्यांच्या सहकाऱ्यांनी केली आहे.