थेऊर, ता. ४ : बेकायदा घातक अग्निशस्त्र जवळ बाळगणाऱ्या टिपू पठाण गँगमधील दोन अट्टल गुन्हेगारांना गुन्हे शाखेच्या पथक क्रमांक एकने सोमवार पेठेतून अटक केले. ही कारवाई सोमवारी (ता. १) करण्यात आली. त्यांच्याकडून एक गावठी बनावटीची पिस्टल आणि दोन जिवंत काडतुसे असा ४२ हजार रुपयांचा मुद्देमाल हस्तगत करण्यात पोलिसांना यश आले आहे.
या दोन आरोपींपैकी एक आरोपी हा कुंजीरवाडी (ता. हवेली) येथील आहे. तालीम आस मोहंमद खान ऊर्फ आरिफ (वय २४, सध्या रा. कुंजीरवाडी चौक, नर्सरी फार्म जवळ, लोणी काळभोर) व युनुस जलील खान (वय २४, रा. गल्ली. नं. १६, सय्य्दनगर हडपसर) अशी अटक केलेल्या आरोपींची नावे आहेत. या प्रकरणी पोलिस अंमलदार अनिकेत बाबर यांनी समर्थ पोलिस ठाण्यात फिर्याद दिली आहे. पुढील तपास पोलिस उपनिरीक्षक राहुल मखरे करीत आहेत.