थेऊर, ता. १ : उसाच्या गुऱ्हाळासाठी ऊसतोड मजूर आणून देतो, असे सांगून दोन चुलत भावांनी लोणी काळभोर येथील पोलिस पाटलांची ५ लाख २२ हजार रुपयांची फसवणूक केली. याप्रकरणी दोघांच्या विरोधात गुन्हा दाखल केला आहे.
याबाबत लोणी काळभोरचे पोलिस पाटील लक्ष्मण दशरथ काळभोर (वय ५९, रा. तरवडी, लोणी काळभोर) यांनी लोणी काळभोर पोलिस ठाण्यात दिलेल्या फिर्यादीवरून कालूसिंग पावरा व भाईदास पावरा (दोघे रा. तेलखडे, ता. धडगाव, जि. नंदुरबार) यांच्यावर गुन्हा दाखल केला आहे.
पोलिसांनी दिलेल्या माहितीनुसार, लक्ष्मण काळभोर यांचा कृष्णाई गूळ उद्योग समूह या नावाने गुऱ्हाळ व्यवसाय आहे. ऑक्टोबर २०२४ पासून कालु‌सिंग पावरा हा त्यांच्या गुऱ्हाळावर काम करीत होता .एप्रिल २०२५ मध्ये कालुसिंग याने सांगितले की, आमच्या गावाकडे ऊसतोड मजुर आहेत व माझा चुलत भाऊ भाईदास हा टोळीचा मुकादम आहे. त्याच्याकडे ४० ते ५० कामगार असून चर्चा करून आम्ही त्यांना घेऊन येतो.
कालुसिंग हा काम करीत असल्याने काळभोर यांचा त्याच्यावर विश्वास बसला होता. त्यानंतर तो कामगार आणण्यासाठी नंदुरबारला गेला. गावाला गेल्यानंतर त्यानी काळभोर यांना फोन करून कामगार भेटले असून त्यांना २० हजार रुपये ॲडव्हान्स पाठवून द्या. त्यानंतर काळभोर यांनी फोन पेवरून प्रथम २० हजार व दुसऱ्यांदा २ हजार रुपये पाठवून दिले. त्यानंतर १० मे २०२५ रोजी कालुसिंग याचा काळभोर यांना पुन्हा फोन आला. त्यावेळी त्याने ४० ते ५० कामगार जमवले असून, त्यांना उचलेपोटी रक्कम द्यावी लागेल, त्यासाठी ५ लाख रुपये रोख घेऊन या, असे सांगितले. कामगार मिळतील, या अपेक्षेने काळभोर हे ५ लाख रुपये घेऊन नंदुरबार येथे गेले व त्यांनी कालुसिंग याच्यावर विश्वास ठेवून सदर रक्कम त्याच्याकडे दिली. दोन दिवसानंतर काळभोर यांनी कालुसिंगला फोन करून मजुरांच्या संदर्भात विचारणा केली असता त्याने लोकांची जुळवाजुळव झाली आहे. आम्ही दोन दिवसात सर्वजण येणार आहोत, असे सांगितले, परंतु ते आले नाहीत. आपली फसवणूक झाली असल्याचे लक्षात आले. त्यामुळे लक्ष्मण काळभोर यांनी लोणी काळभोर पोलिस ठाण्यात फिर्याद दिली. त्यानुसार दोघांच्या विरोधात गुन्हा दाखल करण्यात आला. तपास सहाय्यक पोलिस निरीक्षक अंकुश बोराटे करीत आहेत.