थेऊर, ता. २९ : लोणी काळभोर (ता. हवेली) येथील पृथ्वीराज कपूर मेमोरिअल हायस्कूल व ज्युनिअर कॉलेजच्या संघाने पुणे विभागस्तरीय खो-खो क्रीडा स्पर्धेचे द्वितीय क्रमांक पटकाविला आहे. तर या स्पर्धेत सोलापूर ग्रामीणचा खो-खो संघ विजेता ठरला आहे.
महाराष्ट्र राज्य क्रीडा व युवक सेवा संचालनालय पुणे व जिल्हा क्रीडा विभाग यांच्या वतीने या स्पर्धा चिंचवड येथील सह्याद्री क्रीडा मंडळ येथे रविवार (ता. २६) ते सोमवार (ता. २७) या दरम्यान खेळल्या गेल्या. स्पर्धेत पुणे ग्रामीणच्या १७ वर्ष वयोगटातील मुलांच्या संघाचे नेतृत्व पृथ्वीराज हायस्कूलचा खो-खो संघ करीत होता. या स्पर्धेत संघाने सोलापूर शहर संघाचा पराभव करून उपांत्य सामन्यात प्रवेश केला. उपांत्य फेरीत संघाचा सामना अहिल्यानगर ग्रामीण या संघासोबत झाला. हा सामना तीन गुणांनी जिंकून पुणे ग्रामीण संघाने थेट अंतिम फेरीत प्रवेश केला.
अंतिम सामन्याची लढत पुणे ग्रामीण व सोलापूर ग्रामीण संघात झाली. हा सामना सोलापूर ग्रामीण संघाने जिंकला तर पृथ्वीराज हायस्कूलच्या संघास द्वितीय क्रमांकावर समाधान मानावे लागले. सर्वोत्कृष्ट आक्रमक खेळाडू म्हणून आदेश पाटील याची निवड करत ट्रॉफी देऊन त्याचा सन्मान करण्यात आला. खेळाडूंना मार्गदर्शन करणारे क्रीडा शिक्षक सुरेश कोरे व राजेश चौरे यांचे विद्यालयाच्या वतीने प्राचार्य सीताराम गवळी यांनी अभिनंदन केले. यावेळी पिंपरी चिंचवड महानगरपालिकेचे माजी उपमहापौर तुषार हिंगे, भारतीय खो- खो संघाचे प्रशिक्षक शिरीन गोडबोले, रवींद्र गारगोटे, उपप्राचार्य विलास शिंदे, सांस्कृतिक विभाग प्रमुख दयानंद जानराव आदी उपस्थित होते.
उपविजेता ठरलेल्या संघातील खेळाडूंची नावे - आदेश पाटील, सोहम खामकर, रोहन खामकर, साहिल वडतिले, साई साळुंखे, सुनीत मोरे, प्रशांत खरात, ऋषिकेश साळुंखे, रुद्र तांदळे, आर्यन हालमे, आशुतोष लंगर, अरमान कोरबू, आर्यन तिकुडवे, कार्तिक खोचरे, संस्कार कोरे.