थेऊर, ता. १९ : लोणी काळभोर, कदमवाकवस्ती, थेऊर फाटा, थेऊर, कुंजीरवाडी, सोरतापवाडी, नायगाव, उरुळी कांचन या पूर्व हवेलीतील परिसरामध्ये जिओ मोबाइलचे नेटवर्क अत्यंत निकृष्ट पातळीवर कार्यरत असल्याने ग्राहकांना याचा त्रास होत आहे.
अडचणीच्या काळात तातडीचा संपर्क होण्यासाठी मोबाइलचा वापर केला जातो. परंतु जिओ कंपनीच्या नेटवर्क घोटाळ्यामुळे फोन लवकर लागत नाही. लागला तर आवाज येत नाही, आवाज आला तर फोन मध्येच कट होतो. त्याच्यामुळे अडचणीच्या काळात संपर्क होणे मुश्कील होत आहे.
‘‘या परिसरातला विद्युत पुरवठा खंडित झाला की लगेच नेटवर्क जात आहे. जिओ कंपनीच्या ग्राहक सेवा केंद्राकडे फोन केला तर याची दखल घेतली जात नाही. तक्रारीकडे सोईस्कर दुर्लक्ष केले जाते, ही बाब अत्यंत चुकीची आणि ग्राहकांची पिळवणूक करणारी आहे.’’ अशी तक्रार थेऊरचे रहिवासी लक्ष्मण चव्हाण यांनी व्यक्त केली.