थेऊर, ता. १ : महिला मुकादमाने मजूर देण्यास नकार दिल्याचा राग मनात धरून आचाऱ्याकडून तिच्या मुलीचा विनयभंग करीत महिलेस अश्लील शिवीगाळ व मनास लज्जा उत्पन्न होणारे कृत्य केले. याप्रकरणी पीडितेने आचाऱ्याविरोधात तक्रार दिली आहे. लोणी काळभोर पोलिसांनी मुकादम महिलेने दिलेल्या फिर्यादीवरून नीलेश म्हात्रे (रा. लोणी काळभोर, ता. हवेली) याच्या विरोधात गुन्हा दाखल केला आहे.
पोलिसांनी दिलेल्या माहितीनुसार, पीडित महिला परिसरातील मंगल कार्यालय, तसेच इतर कार्यक्रमामध्ये आचाऱ्यांना लागणारे महिला मजूर पुरविण्याचे काम करतात. त्या आचारी म्हात्रे यास मागील सहा महिन्यांपासून वेगवेगळ्या कार्यक्रमांसाठी महिला मजुरांचा पुरवठा करत होत्या. त्यांनी म्हात्रे यास आळंदी म्हातोबाची व इतर ठिकाणच्या कार्यक्रमांसाठी वेळोवेळी १०५ महिला मजूर पुरवले होते. त्याचे पैसे बरेच दिवस झाले त्याने दिले नव्हते. वारंवार पैसे मागितल्याने त्याने टप्प्याटप्प्याने पैसे दिले. त्याच्याकडे आणखी १७ हजार ५०० रुपये येणे बाकी आहे. २१ नोव्हेंबर रोजी म्हात्रे याने फोन करून केटरिंगच्या कामासाठी महिला मजुरांची मागणी केली होती. त्यावेळी त्यास तुम्ही पैसे देत नाही म्हणून मी मजूर पुरवणार नाही, असे महिलेने सांगितले होते. याचा राग मनात धरून म्हात्रे याने शनिवारी (ता. २२) दुपारी १२ वाजण्याच्या सुमारास पीडितेची मुलगी शाळेतून घरी चालत येत असताना, दुचाकीवर मुलीचा पाठलाग करून, दुचाकी आडवी लावून मुलीकडे वाईट नजरेने पाहून मी तुझ्यासोबत वाईट करील, असे बोलून विनयभंग केला. त्यानंतर शनिवार दुपारच्या सुमारास पीडित महिलेच्या घरासमोर येऊन तुला काय करायचे ते कर, असे म्हणाला व अश्लील शिवीगाळ केली. पुढील तपास पोलिस उपनिरीक्षक प्रल्हाद जगताप हे करत आहेत.