उरुळी कांचन, ता. १४ : जमिनीच्या वादातून शेतकऱ्यावर धारदार शस्त्रांनी हल्ला केल्याप्रकरणी वळती (ता. हवेली) येथील आठ जणांवर उरुळी कांचन पोलिसांनी गुन्हे दाखल केले आहेत. दोन्ही गटांनी दिलेल्या परस्परविरोधी फिर्यादीवरून ही कारवाई करण्यात आली.
पोलिसांनी दिलेल्या माहितीनुसार, पहिली फिर्याद अरविंद मच्छिंद्र कुंजीर (वय ५०, रा. वळती, ता. हवेली) यांनी दिली. रविवारी (ता. १२) सायंकाळी सहाच्या सुमारास ते शेतात पाणी देत असताना बांधावरील झाडांच्या वादातून संभाजी एकनाथ कुंजीर (वय ४२), शैला संभाजी कुंजीर (वय ३६, दोघे रा. वळती, ता. हवेली), दिनेश शांताराम म्हस्के (वय ३४) व उमेश शांताराम म्हस्के (वय ३५, दोघे रा. डाळींब, ता. दौंड) यांनी त्यांच्यावर कोयता, गज व विळ्याने हल्ला करीत जिवे मारण्याची धमकी दिली. यात कुंजीर गंभीर जखमी झाले आहेत.
दुसऱ्या घटनेत, एका महिलेने दिलेल्या फिर्यादीनुसार अरविंद कुंजीर, वैशाली कुंजीर, सृष्टी कुंजीर आणि (सर्व रा. वरचा मळा, वळती) व अजित भिसे (रा. कासुर्डी) यांच्यावर गुन्हा दाखल झाला आहे. आरोपींनी महिलेला अश्लील शिवीगाळ करत मारहाण केली व विनयभंग होईल असे वर्तन केले, तसेच तक्रार दिल्यास हातपाय तोडण्याची धमकी दिल्याचे फिर्यादीत म्हटले आहे. उरुळी कांचन पोलिस या प्रकरणाचा अधिक तपास करत आहेत.