ओतूर, ता. २ ः खामुंडी (ता. जुन्नर) येथील शेतकरी दीपक ज्ञानेश्वर कोकाटे यांचा बैलगाडीला जुंपलेला बैल गाडीसह कठडा नसलेल्या विहित पडून ठार झाला. खामुंडी येथील सोमनाथनगर परिसरातील तेलदरा शिवारात त्याचा मुलगा प्रणव कोकाटे आपल्या जनावरांना चारा आणण्यासाठी त्यांची एक बैलगाडी घेऊन बुधवारी (ता. १) सायंकाळी गेला होता. जनावरांचा चारा बैलगाडीत घेऊन परतताना अचानक बैलाने कशाला तरी घाबरून मुसंडी मारली. बैलाने मुसंडी मारल्याने बैल हा गाडीसह जवळच असलेल्या कठडा नसलेल्या विहिरीत पडल्याने बैलाचा जागीच मृत्यू झाला. प्रणव ने प्रसंगावधान दाखवून बैलगाडीतून उडी मारल्याने त्याचा जीव वाचला. ही घटना समजताच सामाजिक कार्यकर्ते कैलास बोडके यांनी आळेफाटा येथील महालक्ष्मी क्रेनचे मालक किरण पुरी यांना संपर्क करून क्रेन बोलावून घेतली. रात्री उशिरा दीपक कोकाटे व बाबू कोकाटे यांनी क्रेनच्या साहाय्याने विहिरीत ५० ते ६० फूट उतरून खामुंडी गावातील तरुणांच्या मदतीने अथक प्रयत्न करून बैलाचा मृतदेह आणि बैलगाडी रात्री १.३० च्या सुमारास विहिरीच्या बाहेर काढली. शेतकऱ्याचा बैल ठार झाल्याने त्यांचे मोठे आर्थिक नुकसान झाले आहे. पीडित शेतकऱ्याला आर्थिक भरपाई किंवा बैल शासनाकडून किंवा सामाजिक संघटनेकडून मिळावा, अशी मागणी होत आहे.

खामुंडी (ता. जुन्नर) ः कठडा नसलेली विहीर.