ओतूर, ता. १७ : येथील पोलिसांनी जुन्नर तालुक्यातील ओतूर, रोहकडी, खामुंडी परिसरातील विहिरी व नदी परिसरातील विद्युत मोटारीचे केबल चोरी करणाऱ्या टोळीला अटक केली.
याप्रकरणी केशव बबन काळे (रा. कुरकुंडी, ता. संगमनेर, जि. अहिल्यानगर), किशोर सुरेश काळे (रा. भोजदरी, ता. संगगनेर), राहुल विठ्ठल काळे (रा. भोजदरी, ता. संगमनेर), दीपक तात्याबा डोके (रा. सावरचोळ, ता. संगमनेर), सोबरन राजाराम चौहान (रा. घारगाव, ता. संगमनेर; मूळ रा. मध्यप्रदेश) व मेटल खरेदी व्यावसायीक विक्रमसिंग अमरसिंग राठोड (रा. आळेफाटा, ता. जुन्नर), मूळ रा. राजस्थान) यांना अटक केली आहे. त्यांच्याकडून नऊ हजार रुपये किमतीचे विद्युत मोटारीचे केबल जाळून त्यातून काढलेल्या १८ किलो वजनाच्या धातूच्या तारा, पाच हजार रुपये किमतीच्या विद्युत मोटारीचे काळे केबल, शंभर रुपये किमतीचे एक कटर, गुन्हा करताना वापरलेले वाहने एक लाख रुपये किमतीची दोन बजाज पल्सर मोटार सायकल, असा एकूण १ लाख १४ हजार १०० रुपये किमतीचा मुद्देमाल जप्त केला. सर्व अटक आरोपींना जुन्नर न्यायालयाने पोलिस कोठडी ठोठावली आहे.
ओतूरचे सहायक पोलिस निरीक्षक एल. जी. थाटे, पोलिस उपनिरीक्षक युवराज जाधव, संदीप आमणे, पोलिस हवालदार महेश पटारे, बाळशीराम भवारी, नामदेव बांबळे, नदीम तडवी, विशाल गोडसे, सुभाष केदारी, श्यामसुंदर जायभाये यांनी संबंधित कामगिरी केली आहे.