उद्धट, ता. २३ : जिल्ह्यातील गावांमध्ये मोठमोठे खर्च केलेले सीसीटीव्ही काही दिवसातच बंद पडलेल्या अवस्थेत आहेत त्याच्याकडे लक्ष द्यायला सरपंचांना किंवा ग्रामसेवकांना वेळ नाही.
पुणे जिल्ह्यातील सर्वच गावांमध्ये सीसीटीव्ही यंत्रणा बसवण्यासाठी लाखोंचा निधी ओतण्यात आलेले असून या यंत्रणेचा वापर; मात्र मोजक्याच गावांमध्ये झालेला दिसून येतो. या बंद सीसीटीव्हीमुळे पोलिस यंत्रणेला मात्र आरोपी शोधण्यासाठी खूप कसरत करावे लागत आहे. एखादा आरोपी गुन्हा करून एखाद्या सीसीटीव्ही समोरून जरी गेला तरी त्याचा शोध घेणे सोपे होते; परंतु जर सीसीटीव्ही यंत्रणाच बंद असेल तर मात्र आरोपी पोलिसांसमोरून जरी गेला तरी त्याचा काही सुगावा लागत नाही. काही गावांमध्ये चोऱ्यांचे सूत्र सुरू सुरू असताना देखील अजून गावातल्या कारभाऱ्यांचे डोळे उघडत नाहीत ही बाब मात्र खेदजनक आहे. या संदर्भात शासनाने ग्रामसेवकांद्वारे या सीसीटीव्हीची दुरुस्ती करून घेऊन हे सीसीटीव्ही लवकरात लवकर सुरू करून घ्यावेत, अशी मागणी ग्रामस्थांकडून होत आहे.

बंद सीसीटीव्हीमुळे पोलिस प्रशासनाला आरोपी मिळणे थोडे कठीण होत आहे. जर सीसीटीव्ही फुटेजमध्ये गुन्हा एकदा क्लिक झाला तर तो आरोपी पोलिसांकडून सुटणे अशक्य आहे; परंतु बंद सीसीटीव्हीमुळे या सगळ्या शक्यतांवर पाणी फिरत आहे, त्यामुळे गावांमधील सीसीटीव्ही यंत्रणा तातडीने दुरुस्त करून घ्याव्यात ही पोलिस प्रशासनाची विनंती आहे.
- राजकुमार डूनगे, साहाय्यक पोलिस निरीक्षक, वालचंदनगर (ता. इंदापूर)