उंडवडी, ता. ८ : परतीचा प्रवास करत असलेल्या संत तुकाराम महाराज पालखी सोहळ्याचे बऱ्हाणपूर, बनवाडी व उंडवडी सुपे सह परिसरात मोठ्या उत्साहात स्वागत करण्यात आले. पालखी सोहळा शुक्रवारी (ता. ७ ) सायंकाळी सात दरम्यान बऱ्हाणपूर (ता. बारामती) येथे मुक्कामी दाखल झाला होता. तर सकाळी उंडवडी सुपे येथे न्याहरी करून पुढे मार्गस्थ झाला. पालखीचे परिसरातील भाविकांनी दर्शन घेतले.
बऱ्हाणपूर येथील रात्रीचा मुक्काम आटपून शनिवारी (ता. ८) सकाळी पूजापाठ करून पालखी सोहळा बनवाडी व उंडवडी सुपे येथे न्याहरीसाठी दाखल झाला होता. पालखीमुळे परिसरातील वातावरण भक्तिमय झाले होते. या वेळी शाळेतील मुले, महिला, ग्रामस्थ यांनी दर्शनाचा लाभ घेतला. गावकऱ्यांच्या वतीने सोहळ्यातील वारकऱ्यांना पिठले भाकरीचे भोजन देण्यात आले.
उंडवडी सुपे येथे भोजन केल्यानंतर थोडा विसावा करून पालखी सोहळा खराडेवाडी मार्गे दौंड तालुक्यात मार्गस्थ झाला. परतीचा पालखी सोहळा यंदा पाऊस नसल्याने कोरडा गेला आहे. पाऊस पडावा, यासाठी वारकरी विठुराया चरणी साकडे घालत आहेत.