उंडवडी, ता. ८ : उंडवडी सुपे (ता. बारामती) येथे खासदार सुप्रिया सुळे, आमदार रोहित पवार व योगेंद्र पवार यांनी शिरसाई योजनेच्या लाभार्थी शेतकऱ्यांची बैठक घेऊन योजनेचा आढावा घेतला. या बैठकीत शेतकऱ्यांनी शिरसाई योजनेतील विविध अडीअडचणी मांडल्या.
यावेळी पक्षाचे तालुकाध्यक्ष एस. एन. जगताप, वनिता बनकर, सरपंच शोभा कांबळे, उपसरपंच अनिल गवळी, अक्षय गवळी अमोल गवळी, विठ्ठल जराड यांच्यासह पदाधिकारी व ग्रामस्थ उपस्थित होते.
लोकसभा निवडणुकीत प्रचंड मताने विजयी झाल्यानंतर खासदार सुळे यांचा कामकाजाला सुरवात केल्यामुळे स्थानिक पदाधिकाऱ्यांनी खासदार सुप्रिया सुळे यांचा सत्कार केला.
याप्रसंगी जनाई शिरसाई योजनेच्या आढावा बैठकीत शिरसाईच्या लाभार्थी शेतकऱ्यांनी विविध अडचणी मांडल्या. तसेच माजी सरपंच विठ्ठल जराड यांनी देखील योजनेतील अडचणी व उपाययोजना मांडल्या.

यादरम्यान जनाई शिरसाई योजनेतील अडीअडचणी जाणून घेतल्यानंतर आमदार रोहित पवार म्हणाले, ‘‘जनाई शिरसाई योजना क्षमतेने चालविण्यासाठी आम्ही लक्ष घालणार असून केंद्रीय माजी कृषीमंत्री शरद पवार व लाभार्थी गावातील जानकार मंडळींची लवकरच स्वतंत्र बैठक लावण्यात येईल.’’