उंडवडी, ता. १५ : खराडेवाडी (ता. बारामती) येथील एका शेतातील रस्ता बंद झाल्यामुळे परिसरातील १०० एकरातील पंधरा ते वीस शेतकऱ्यांची सर्वच कामे ठप्प झाली होती. मात्र, तंटामुक्तीच्या पदधिकाऱ्यांनी पुढाकार घेऊन सामंजस्याने मार्ग काढला. संबंधित शेतकऱ्यांनी देखील प्रतिसाद देत एकत्रित येत लोकवर्गणीतून रस्ता पूर्ण केला. त्यामुळे सर्वांचाच शेतात ये-जा करण्याचा मार्ग एकच दिवसात मोकळा झाला.

खराडेवाडी हद्दीतील केवडेमळा नजिक भापकरवस्तीवरील शेतकऱ्यांचा आपसातील गैरसमजुतीतून तीन - चार दिवसांपूर्वी शेतात जाण्याचा रस्ता बंद झाला होता. यामध्ये शेतकऱ्यांनी या रस्त्यावरील मुरम काढून घेतला होता व संपूर्णतः वहिवाट केली होती. त्यामुळे येथील गट नंबर ९३, १०५, १०८, १०७, १०९, ११०, ११२, ११३, ११५, ११७, ११८, ११९ या शेतात ये - जा करण्यासाठी रस्ताच बंद झाला होता. त्यामुळे परिसरातील शेतकऱ्यांची गैरसोय झाली होती. विशेष म्हणजे, खरीप हंगामातील पेरण्या व शेतीची पूर्व मशागतीची कामे थांबली होती. अखेरला, या रस्त्याचा वाद एकाच दिवसात मिटवून रस्ता खुला करण्यात येथील महात्मा गांधी तंटामुक्ती समितीचे अध्यक्ष नीलेश वाबळे व मधुकर भोसले यांना यश आले आहे.

तंटामुक्तीच्या निकालाचे कौतुक
सकाळी त्याच शेतात तंटामुक्ती समिती व संबंधित शेतकऱ्यांची बैठक पार पडून रस्त्याचा वाद मिटला आणि सायंकाळपर्यंत संबंधित सर्वच शेतकऱ्यांनी पुन्हा पूर्वीप्रमाणे एकत्रित येत लोकवर्गणीतून जेसीबी मशिन व ट्रॅक्टरच्या साह्याने रस्त्याचे मुरमीकरण करुन घेतले. आत्ता हा रस्ता सर्वांसाठी खुला झाला असून सर्वच शेतकरी गुण्यागोविंदाने पुन्हा एकत्रित आल्याचे पाहावयास मिळाले. त्यामुळे तंटामुक्तीचा एका दिवसात दिलेला निकाल आणि त्यानंतर झटपट झालेला रस्ता याचे कौतुक होत आहे.

02749