उंडवडी, ता. १६ : संत तुकाराम महाराज पालखी महामार्गावरील खराडेवाडी (ता. बारामती) हद्दीतील गावठाण नजीक साइड पट्टीच्या गटाराचे काम रखडले आहे. या गटारासाठी घेतलेल्या चारीत पादचारी किंवा छोट्या- मोठ्या वाहनांचा अपघात घडण्याची शक्यता निर्माण झाली आहे.
या महामार्गावरील पावसाचे पाणी बाजूच्या चारीने काढून देण्यासाठी रस्त्याच्या दुतर्फा भूमिगत गटार योजना राबविण्यात आली आहे. मात्र, या ठिकाणच्या गटाराचे काम रखडले आहे. त्यामुळे गटार चारी उघडी पडली असू, यावर सिमेंट कॉंक्रेटचा स्लॅब टाकलेला नाही. त्यामुळे येथील चारी धोकादायक बनली आहे.
येत्या २५ जूनला संत तुकाराम महाराज पालखी सोहळा याच रस्त्यावरून जाणार आहे. त्यामुळे रात्री- अपरात्री किंवा या चारीत पावसाचे पाणी साचल्यानंतर, वारकरी- पादचारी, दुचाकीस्वार, तसेच चारचाकी वाहने या चारीत पडून अपघात घडण्याची शक्यता नाकारता येत नाही. त्यामुळे येथील भूमिगत गटारावर स्लॅब टाकून खड्डा बंद करण्यात यावा, अशी मागणी येथील माजी सरपंच गजानन भापकर, संतोष भापकर, मधुकर भोसले यांच्यासह ग्रामस्थांकडून होत आहे.